कोरोनाको नयाँ विरामी फेला परेन – प्रवक्ता

काठमाडौं । नेपालमा थप नयाँ बिरामी फेला नपरेको स्वास्थ्य मन्त्रालयका प्रवक्ता डा विकास देवकोटाले बिहीबार पत्रकार सम्मेलनमा बताए । पत्रकार सम्मेलनमा बोल्दै प्रवक्ता डा विकास देवकोटाले थप नयाँ कोरोनाको बिरामी फेला नपरेको जानकारी दिएका हुन् । उनले भने– ‘परीक्षणको दायरा बढ्दैछ, तर नयाँ बिरामी फेला परेको छैन ।’
हालसम्ममा दुई हजार ८९५ जनाको कोरोना परीक्षण गरिएको उनले बताए । जसमा दुई हजार ३८२ जनाको राष्ट्रिय जनस्वास्थ्य प्रयोगशाला काठमाडौं र ५१३ जनाको उपत्यका बाहिर निर्माण गरिएको प्रयोगशालामा कोरोना परीक्षण गरिएको हो । त्यस्तै बिहीबार १९३ जनाको नमूना परीक्षण भइरहेको प्रवक्ता डा देवकोटाले बताए ।
स्वास्थ्य मन्त्रालयका अनुसार हालसम्म सात हजार ९४० जना क्वारेन्टिनमा बसेको र ११७ जना आइसोलेसनमा उपचाररत रहेका छन् । आइसोलेसनमा रहनेहरुमा ९९ जना उपत्यका बाहिरका छन् । नेपालमा हालसम्म ९ जनामा कोरोनाको संक्रमण फेला परेको छ । जसमध्ये एक जना पूर्ण रुपमा निको भइसकेका छन् भने ८ जना उपचारकै क्रममा छन् ।