रुकुम घटनामा ५ जनाको मृत्यु, सबैको टाउकोमा चोट

जाजरकोट । रुकुमको चौरहारीमा शनिबार भएको घटनामा मृतक सबैको टाउकोमा चोट देखिएको खुल्न आएको छ । बिहीबारसम्म फेला परेका पाँचजना मृतकको टाउकोमा चोट लागेको पाइएको जिल्ला प्रहरी प्रमुख डीएसपी किशोर श्रेष्ठले बताए ।
डीएसपी श्रेष्ठका अनुसार फेला पारेका सबैको शवका टाउकोमा चोट पाइएको छ । घटनामा बेपत्ता भएका थप एकजना बिहीबार मृत अवस्थामा फेला परेका छन् ।
भेरी नगरपालिका–४ खलंगाका १९ वर्षीय सञ्जु विकको शव घटनास्थलदेखि करिब ४० किलोमिटर जिल्लाको छेडागाड नगरपालिका १३ कालाभुर नजिक भेरी नदीको खोचमा फेला परेको डीएसपी श्रेष्ठले बताए ।
खोजीमा संलग्न भेरी नगरपालिका ११ का स्थानीय मुक्ति आचार्यले शवको टाउको कुच्चिएको र अण्डकोष सुनिएको अवस्थामा फेला परेको बताए । भेरी नगरपालिका ११ का गोविन्द शाही अझै बेपत्ता छन् ।
(यो समाचार आजको अन्नपूर्ण पोस्ट् दैनिकमा राजेन्द्र कार्कीले लेखेका छन् ।)