वडा नं. १६ मा ३ महिलासहित ५२ जना क्वारिन्टिनमा

मंगलपुर, चितवन / भरतपुर वडा नं. १६ मा असार ९ गतेदेखि २२ गते सोमबारसम्म २३ जना क्वारिन्टिनमा थपिएका छन् । यसअघि २९ जना भएको र थप २३ सँगै क्वारिन्टिनमा ५२ जना रहेको वडाका अध्यक्ष अमृतराज हमालले जानकारी दिए । उनीहरु सबैलाई भरतपुर महानगरको समन्वयमा १४ दिने क्वारिन्टिनमा राखिएको वडा अध्यक्ष हमालले बताए ।
उनीहरु सबै विदेशबाट आएका हुन् । वैदेशिक रोजगारीको सिलसिलामा गएका र केही शैक्षिक अध्ययनका लागि विदेश गएका हुन् ।
अध्यक्ष हमालका अनुसार पछिल्लो पटक भारतबाट १२, अमेरिका १, साउदी २, दुबई ३, कुबेत १, बहराइन १ जना आएका हुन् ।
उनले भने महिलाहरुलाई वडा नं. १६ को पुरानो गाविस भवनमा राखिएको छ । अन्यलाई वडाकै मातहतको भवन र चारपाते युवा समाज युवा क्लब राखिएको छ । पछिल्लो समय संख्यात्मक रुपमा वृद्धि भएपछि केहीलाई सम्बन्धितकै घरमा क्वारिन्टिनमा बस्न लगाइएको उनले थपे ।
वडा नं. १६ को पुरानो गाविस भवनमा १५ सिट, रेडक्रस भवनमा ७ सिट र चारपाते युवा समाज विजयनगरमा १३ सिट क्षमताको बेड तयारी रहेको छ र अझ बढी सिटहरु थप्ने तयारी भइरहेको उनले जानकारी गराए ।