गरिब तथा विपन्नलाई लिच्ची र आपको विरुवा वितरण

राप्ती । राप्ती न पा वडा नं ७ ले नगरपालिकाका कृषि शाखाबाट प्राप्त लिच्ची र आपको विरुवा गरिब तथा विपन्न समुदायलाई वितरण गरेको छ । सोमबार राप्तीका वडा अध्यक्ष सुमिता डल्लकोटीले विपन्न तथा सिमाक्रित चेपाङ जातको बाहुल्यता रहेको रामपुर झर्ना सुकुम्बासी डाँडामा पुगेर विरुवा वितरण गरिएको हो ।
उक्त कार्यक्रममा वडा अध्यक्ष डल्लाकोटीले गरिबी तथा विपन्नलाई माछा मारेर खान दिनुभन्दा पनि माछा मारेर खान सिकाउनु उत्तम उपाय रहेको जनाउदै फलफूलको विरुवा दिए, भोलि फल खान पाउने आशामा मल जल गरेर विरुवा हुर्काउने कुरामा जोड दिन आग्रह गरिन् ।
उनका अनुसार जनताको घरघरमै पुगेर विरुवा वितरण गर्दा सरकारको ‘एक घर, एक विरुवा’ नीति र नारालाई समेत सहयोग पुग्ने देखिएको बताए ।
कार्यक्रममा वडा सदस्यहरु डिल कुमारी पुन लगायत स्थानीयहरुको उपस्थिति रहेको थियो ।