पत्रकार अधिकारीद्वारा ‘कुमाता’ र ‘एकान्तवास’ पुस्तक महासंघलाई प्रदान

चितवन । नेपाल पत्रकार महासंघ चितवनका उपाध्यक्ष एवम् नेपाल प्रेस युनियन चितवनका निवर्तमान अध्यक्ष नारायणप्रसाद अधिकारीद्वारा ‘कुमाता’ र ‘एकान्तवास’ पुस्तक महासंघलाई हस्तान्तरण गरिएको छ ।
उक्त पुस्तकहरु १०÷१० थान खरिद गरी अधिकारीले महासंघका अध्यक्ष राधेश्याम खतिवडालाई हस्तान्तरण गरिएको हो । अधिकारीले आफ्नो कान्छो छोरा साकार अधिकारीको जन्मोत्सवको अवसर पारेर ती किताबहरु हस्तान्तरण गर्नु भएको हो ।
पुस्तक हस्तान्तरण गर्दै अधिकारीले भन्नुभयो, पुस्तक लेखकहरुलाई अझ बढी उर्जा प्रदान होस् भनेर मैले छोराको जन्मदिनको अवसरमा पारेर सो पुस्तक खरिद गरी महासंघलाई प्रदान गरेको हुँ । सो अवसरमा नेपाल पत्रकार महासंघका केन्द्रीय सदस्य कृष्ण गिरी, सम्पूर्ण किताब घरका संचालक लेखराम सापकोटालगायतको उपस्थितिमा पुस्तक हस्तान्तरण गरिएको हो ।
नेपाल पत्रकार महासंघ चितवनका अध्यक्ष राधेश्याम खतिवडाले यी पुस्तकहरु पत्रकार महासंघको पुस्तकालयमा राखिने बताउनु भयो । उहाँले पत्रकारहरुको लेखन क्षमताको कदर महासंघले गर्ने बताउनुभयो ।
उक्त ‘कुमाता’ पुस्तकका लेखक बसन्त पराजुली हुन् भने ‘एकान्तवास’का लेखक विनोदबाबु रिजाल रहेका छन् ।