ट्रकसँग ठक्कर खाँदा कन्टेनर त्रिशुलीमा

त्रिशुली, चितवन \ बिराटनगरबाट काठमाडौं तर्फ जाँदै गरेको मालवहाक कन्टेनर त्रिशुलीमा खसेको छ । जिल्ला प्रहरी कार्यालय चितवनका अनुसार ना ३ ख ८९८७ नम्बरको कन्टेनर र काठमाडौंबाट नारायणगढतर्फ आउँदै गरेको ना ६ ख ५६८७ नम्बरको ट्रक एक आपसमा ठक्कर खाँदा कन्टेनर त्रिशुलीमा झरेको हो ।
ईच्छाकामना गाउँपालिका वडा नम्बर ५ नाग्दीखोला नजिकबाट कन्टेनर आज बिहान ८ः३५ वजे त्रिशुलीमा खसि वेपत्ता भएको प्रहरीले जनाएको छ । ट्रकका चालक भने सामान्य घाईते भएका छन् ।
प्रहरीका अनुसार उनको स्थानीय मेडीकलमा उपचार भईरहेको छ । कन्टेनरमा भाटभटेनी सुपरमार्केटको सामान रहेको प्रहरीले जनाएको छ । बेपत्ता कन्टेनरको खोजी भईरहेको जिल्ला प्रहरी कार्यालय चितवनका प्रबक्ता सूर्य वहादुर थापाले जानकारी दिनुभयो ।