पोखरा / गण्डकी प्रदेशमा थप ४४ जनामा कोरोनाभाइरसको संक्रमण पुष्टि भएको छ । शनिबार थप ४४ संक्रमित पुष्टि भएको गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा विनोद विन्दु शर्माले जानकारी दिनुभयो ।
प्रवक्ता शर्माका अनुसार गण्डकी प्रदेशमा अहिलेसम्म कोरोना संक्रमितको संख्या दुई हजार ४ सय ४७ पुगेको छ । क्षयरोग उपचार केन्द्र, पोखरामा गरिएको परीक्षणमा ५ जिल्लाका ४४ जनामा संक्रमण पुष्टि भएको हो ।
संक्रमित हुनेहरुमा कास्कीका २२, बाग्लुङका ३, स्याङ्जाका १, नवलपरासी (बर्दघाट सुस्ता पूर्व)का १ र लमजुङका १७ जना रहेका छन् । संक्रमितमध्ये कास्की जिल्ला, पोखरा महानगरपालिकाका २ जना महिला पश्चिमान्चल सामुदायिक अस्पताल, पृथ्वी चोकमा कार्यरत कर्मचारी हुन् ।
पोखरा महानगरपालिका–१७ का २५ वर्षका पुरुष, पोखरा महानगरपालिका–१५ का २८ वर्षीय पुरुष, पोखरा महानगरपालिका–१४ का ४१ र ४४ वर्षीय २ पुरुषहरु र पोखरा महानगरपालिका–२४ का ३१ वर्षीय पुरुष गरी ५ जना भारतबाट आएका हुन् ।
यस्तै, पोखरा महानगरपालिका–१६ का ५२ वर्षीय पुरुष डाँफे सहकारी संस्थामा कार्यरत कर्मचारी हुन् । लमजुङ जिल्ला, वेशीसहरका ४ जना लमजुङ जिल्ला सामुदायिक अस्पतालमा उपचारका लागि भर्ना भएका बिरामीहरु हुन् । अन्य सबै कन्ट्याक्ट ट्रेसिङको क्रममा संक्रमण पुष्टि भएको हो ।
- ADVERTISEMENT -
