म्याद गुज्रिएका खाद्य सामग्री बिक्री गर्ने आठ जना पक्राउ

काठमाडौँ / काठमाडौं उपत्यकामा म्याद गुज्रिएका खाद्य सामग्रीको मिति सच्याएर बजारमा विक्री गर्ने गरेको पाइएको छ । महानगरीय प्रहरी अपराध महाशाखा, बाणिज्य आपूर्ति तथा उपभोक्ता संरक्षण विभाग र जिल्ला प्रशासन कार्यालयको संयुक्त टोलीले राजधानीका दुई वटा वितरकका गोदाममा छापा मारी रिलेभलिङ गर्ने र स्टीकर बनाउने मेसिन बरामद गरेको हो ।
उनीहरुले स्निकर्स चकलेट, ओरियो बिस्कुट, बर्न भिटालगायतमा सामग्रीको रिलेभलिङ गर्ने गरेको पाइएको हो । मेसिनद्वारा खाद्य सामग्रीको कभरमा मिति परिवर्तन हुने गरेको महाशाखाले जनाएको छ । काठमाडौँ महानगरपालिका–१४ कलंकी लिङकरोडमा रहेको आयान डिस्ट्रब्युटर्स र एमाजन डिस्ट्रिब्युटर्समा छापा मारिएको थियो ।
पक्राउ पर्नेमा झापाको चन्द्रगढी घर भएकी ६३ वर्षीया पुष्पादेवी अग्रवाल, भारतको राजस्थान घर भएका ३५ वर्षीय रोनक बोथ्रा, रौतहटका २७ वर्षीय मुन्ना ठाकुर र २७ वर्षीय पप्पुकुमार ठाकुर रहेका छन् । यसैगरि महोत्तरीका ४३ वर्षीय श्यामप्रसाद सिंह, धादिङका २६ वर्षीय रामबहादुर बयलकोटी , १८ वर्षीय सिताराम उपरकोटी र २४ वर्षीय दिलिप थापामगर पनि पक्राउ परेका छन् ।