त्रिशुली दुर्घटना अपडेट : २ जनाको शव फेला, एक अझै बेपत्ता

चितवन / प्युठानबाट बिरामी बोकेर काठमाडौं जाँदै गरेको पिकअप भ्यान त्रिशुलीमा खस्दा बेपत्ता भएका तीन मध्य २ जनाको शव फेला परेको छ । बेपत्ता भएका मध्ये चालक प्युठानको झिम्रुक गाउँपालीका वडा नम्बर १ का २३ वर्षीय सुर्य केसी र भ्यानमा सवार सोही स्थानकी ३३ वर्षीया जमुना रोकाको शव फेला परेको हो ।
दुबै जनाको शव भ्यान भित्रै फेला परेको जिल्ला प्रहरी कार्यालय चितवनले जानकारी दिएको छ । बेपत्ता बिरामी १५ वर्षीया जिनिसा रोकाको खोजी भइरहेको प्रहरीले जनाएको छ ।
प्युठानबाट बिरामी बोकेर काठमाडौं जाँदै गरेको लु १ च ९७३१ नम्बरको पिकअप भ्यान आज बिहान ५ः३० बजे इच्छाकामना गाउँपालिका वडा नम्बर ४ नाग्दी खोलास्थित सडकबाट करिब ६० मिटर तल त्रिशुलीमा खसेको हो ।
दुर्घटनामा परी प्युठान घर भएका ३८ वर्षिय मुकुन्द वहादुर रोका घाइते भएका छन् । घाइतेको उपचारका लागि भरतपुर अस्पताल ल्याइएको छ ।