भोलिदेखि नारायणगढ–मुग्लिङ सडक साढे ४ घण्टा बन्द

चितवन / नारायणगढ–मुग्लिङ सडक खण्ड दैनिक साढे ४ घण्टा बन्द हुने भएको छ । उक्त सडक खण्डको चार किलोमा पहिरो रोकथामको लागि बाँकी काम हुने भएकाले भोलि फागुन २३ देखि २९ गतेसम्म बन्द हुने जिल्ला ट्राफिक प्रहरी कार्यालय चितवनका प्रमुख प्रहरी निरीक्षक दयाकृष्ण भट्टले जानकारी दिए ।
प्रमुख भट्टका अनुसार बिहान साढे १० बजेदेखि दिउँसो ३ बजेसम्म सडक बन्द हुने भएको हो । उक्त समयमा दुईतर्फी आवागमन नै अवरुद्ध हुने भएकाले बैकल्पिक बाटो प्रयोग गर्न उनले आग्रह गरे ।
सो अवधिमा नारायणगढ तर्फबाट गएका सवारी साधनहरु जलबिरे र मुग्लिङ तर्फबाट आउने सवारी साधनलाई मुग्लिङ नजिक शान्तिबजारमा रोकिने उनले बताए ।