July 22, 2024

एकाबिहानै सवारी दुर्घटना, तीन जनाको मृत्यु

March 13, 2021

मकवानपुर / हेटौंडा नारायणगढ सडकखण्डमा पर्ने मनहरी गाउँपालिका–६ सुनाचुरीमा सवारी दुर्घटना हुँदा तीन जनाको मृत्यु भएको छ ।
आज बिहान अन्दाजी ३ बजेको समयमा झापाको काँकडभित्ताबाट काठमाडौंतर्फ जाँदै गरेको ना ४ ख ५१४९ नम्बरको यात्रुबहाक बस र विपरित दिशातर्फ जाँदै गरेको ना ६ ख ८९ नम्बरको ट्रक एकापसमा ठोक्किएर दुर्घटना हुँदा दुई भारतीय नागरिकसहित तीन जनाको मृत्यु भएको जिल्ला प्रहरी कार्यालय मकवानपुरले जनाएको छ ।
मृत्यु हुनेमा यात्रुबहाक बस चालक वीरगंज महानगरपालिका वडा नम्बर १५ बस्ने ३५ वर्षीय मदनकुमार थापा क्षेत्री, बसमा सवार भारतको सिस्वा बस्ने अभयलाल कुसुवाह र भारतको बिहार बस्ने सुनिल कुमार रहेको जिल्ला प्रहरी कार्यालय मकवानपुरका प्रहरी नायब उपरीक्षक जयश्वर रिमालले जानकारी दिए ।
उनका अनुसार, दुर्घटनामा परी गम्भीर घाइते भएका बस चालक थापाको पुरानो मेडिकल कलेज भरतपुरमा उपचारको क्रममा आज बिहान ५ बजे मृत्यु भएको हो ।
यसैगरी, बसमा सवार अभयलालको उपचारको लागि हेटौंडा अस्पताल ल्याएको र चिकित्सकले मृत घोषणा गरेको र दुर्घटनामा गम्भीर भएका सुनिललाई उपचारको लागि पुरानो मेडिकल कलेज भरतपुरमा लगिएको र चिकित्सकले मृत घोषणा गरेको जनाइएको छ ।
सोही दुर्घटनामा परी ट्रक चालक, सहचालक, सवार गरी ३ जना र बसका ७ जना गरी १० जना घाइते भएका छन् । घाइतेहरु सबैको चितवनस्थित पुरानो मेडिकल कलेज भरतपुरमा उपचार भइरहेको मकवानपुर प्रहरीले जनाएको छ । उक्त घटनाको विषयमा थप अनुसन्धान भइरहेको छ ।

- ADVERTISEMENT -
- ADVERTISEMENT -