‘जसपा आफैँ देशको नेतृत्व गर्ने शक्ति हो ।’- डा. भट्टराई

काठमाडौं / जनता समाजवादी पार्टी (जसपा)का संघीय परिषद्का अध्यक्ष डा. बाबुराम भट्टराईले जसपाले संघीयता, धर्मनिरपेक्षता र समावेशी लोकतन्त्रविरूद्ध कसैसँग सम्झौता नगर्ने प्रष्ट पारेका छन् । गए राति ट्विट गर्दै उनले जसपा परम्परागत राजनीतिको अग्रगामी विकल्प भएको बताएका हुन् । जसपा कसैको पुच्छर नभएको भन्दै उनले आफैँ देशको नेतृत्व गर्ने शक्ति भएको उल्लेख गरेका छन् ।
उनले लेखेका छन्, “जसपाबारे जान्नैपर्ने कुरा : १. यो तासको जोकर वा सत्तारूपी जुवाको खालको च्याँखेदाउ थाप्ने खेलाडी हैन । बरू, परम्परागत राजनीतिको अग्रगामी विकल्प हो । २. गणतन्त्र, संघीयता, धर्मनिरपेक्षता र समावेशी लोकतन्त्रविरूद्ध कसैसँग सम्झौता गर्दैन । ३. यो कसैको पुच्छर हैन, आफैँ देशको नेतृत्व गर्ने शक्ति हो ।” देशमा सरकार परिवर्तनको आन्तरिक गृहकार्यमा दलहरु जुटेका छन् ।
जसपाका शीर्ष नेताहरुले अरु दलका नेताहरुसँग नयाँ सत्तासमीकरणका विषयमा छलफल गरिरहेका छन् । सोही सन्दर्भमा डा. भट्टराईको यो धारणा सार्वजनिक भएको हो ।