चितवनमा आजबाट स्व. विजय खड्गी स्मृति गोल्डकप सुरु

चितवन / सेन्ट्रल कलेज स्व. विजय खड्गी स्मृति गोल्डकप फुटबल प्रतियोगिता आजबाट नारायणगढको क्याम्पाचौरमा सुरु हुँदैछ । चितवन जिल्ला फुटबल संघ संघद्वारा आयोजित प्रतियोगिताको उद्घाटन भरतपुर महानगरपालिका प्रमुख रेनु दाहालद्वारा हुने बुधबार प्रेस सम्मेलन मार्फत् महासचिव रामहरि ढकालले जानकारी दिए ।
उनका अनुसार प्रतियोगितामा अधिराज्यभरिका उत्कृष्ट दश वटा टिमले प्रतियोगितामा प्रतिस्पर्धा गर्नेछन् । प्रतियोगिता चैत १२ देखि २१ गतेसम्म हुने र प्रतियोगिताको सम्पूर्ण तयारी पूरा भइसकेको उनले बताए ।
उनले प्रतियोगिता अवलोकनका लागि दुई हजार क्षमताको साधारण अस्थायी प्याराफिट र एक सय क्षमताको छुट्टै भिआइपी प्याराफिट पनि तयार पारिएको बताए । प्रतियोगितामा एक ए डिभिजन क्लब र चितवनका २ सहित १० टोली सहभागी हुनेछन् ।
सहभागी ए डिभिजन क्लबमा विभागीय टोली त्रिभुवन आर्मी क्लब रहेको छ भने चितवनको सेन्ट्रल कलेज भरतपुर फुटबल क्लब (बीएसफी) र हानामी एभरेष्ट क्लब गरी दुई टोली सहभागी हुनेछन् ।
यस्तै नुवाकोट युनाइटेड एफसी, फर्साटिकर एफसी रुपन्देही, मकवानपुर ११, लेखनाथ युनाइटेड कास्की, बागमती युवा क्लब सर्लाही, अफ्रिकन रुट्स एसोसिएसन क्यामरुन र अभिषेक चर्च रजहर सहभागी हुनेछन् । सहभागी टिमलाई दुई समुहमा बाँडिएको छ । समुह ‘ए’ मा बीएससी, नुवाकोट, त्रिभुवन आर्मी, फर्साटिकर र मकवानपुर ११ रहेका छन् भने समुह ‘बी’ मा लेखनाथ कास्की, बागमती, एभरेष्ट क्लब, क्यामरुन र अभिषेक चर्च रहेका छन् । दुबै समुहबाट एक–एक टोली फाइनलमा प्रवेश गर्नेछ ।
आज खेल बीएससी र नुवाकोट भिड्दै छन् भने फाइनल खेल २१ गते हुनेछ आयोजकले जानकारी दिए । प्रतियोगिताको बिजेताले ३ लाख तथा उपबिजेताले १ लाख ५० हजार रुपैयाँ प्राप्त गर्नेछ । प्रत्येक खेलको म्यान अफ दि म्याचले ५ हजार, प्रतियोगिताभरको उत्कृष्ट खेलाडीले २० हजार तथा विधागत रुपमा उत्कृष्ट हुने खेलाडीले १०–१० हजार रुपैयाँ प्राप्त गर्नेछन् ।
प्रतियोगिता सम्पन्न गर्नका लागि २७ लाख ७३ हजार खर्च लाग्ने अनुमान गरिएको छ । खेल हेर्नका लागि टिकटको व्यवस्था गरिएको छ । क्वाटरफाइनलसम्मका खेलका लागि टिकट शुल्क ५० तथा सेमिफाइनल र फाइनलका लागि एक सय रुपैयाँ लाग्ने आयोजकले जनाएको छ । टिकट खरिद गर्ने मध्ये प्रत्येक दिन गोलाप्रथाबाट एक जनाले स्मार्ट फोन जित्न सक्ने आयोजकले जानकारी दिए ।
सेन्ट्रल कलेज अफ भोकेसनल ट्रेनिङ सेन्टर प्रतियोगिताको मुख्य प्रायोजक रहेको छ । प्रतियोगिताबाट बचेको रकम स्व फुटबलर बिजय खड्गीको छोराको अध्ययनका लागि सहयोग गरिने बताइएको छ । एन्फा २०५७ ब्याचका खड्गीको वैदेशिक रोजगारका लागि कतार गएका उनको ३२ वर्षको उमेरमा निधन भएको थियो । नेपालबाट अण्डर १३ र अण्डर १४ गरी दुई उमेर समूहका खेल खेलेका थिए । उनले चितवनलाई प्रतिनिधित्व गर्दै थुप्रै प्रतियोगिताहरु समेत खेलेका थिए । बिजयको श्रीमती र ३४ महिनाका एक छोरा छन् ।