July 20, 2024

आर्मी फाइनलमा, भोलि अफ्रिकन रूट्स र बागमती क्लब भिड्ने

March 31, 2021
Photo : Halkaro

चितवन / क्याम्पाचौरमा जारी सेन्ट्रल कलेज स्व बिजय खड्गी स्मृति गोल्डकप फुटबलको फाइनलमा त्रिभुवन आर्मी क्लब प्रवेश गरेको छ । बुधबार ट्राइब्रेकरमा नुवाकोट युनाइटेड क्लबलाई हराउदै ३ का विरुद्ध ४ गोल अन्तरले पराजित गर्दै आर्मी फाइनलमा प्रवेश गरेको हो ।
खेलको टाइब्रेकरमा नुवाकोटका सजिन थापा मगरको पहिलो प्रहार आकाशियो भने सागर स्याङ्तानको चौथो प्रहार आर्मीका गोल रक्षक महेश्वर श्रेष्ठले रोके । त्यसअघि निर्धारित समयको खेल २–२ गोलको बराबरीमा सकिएको थियो । खेलमा अग्रता भने नुवाकोटले लिएको थियो । खेलको चौथो मिनेटमा नै दिपेश आले मगरले उत्कृष्ट भली गोल गर्दै नुवाकोटलाई अग्रता दिलाए । पहिलो हाफमा नै नुवाकोटले अग्रता दोब्बर बनायो । ३५ औं मिनेटमा प्रयास तामाङले नुवाकोटलाई २–० को अग्रता दिलाए ।
पहिलो हाफमा खराब प्रदर्शन गरेको आर्मी दोस्रो हाफमा भने खेलमा फर्कियो । दोस्रो हाफको दोस्रो मिनेटमा नै आर्मीले अग्रता छोट्यायो । आर्मीका सुशान्त चौधरीले गोल गरे । दोस्रो हाफको २० औं मिनेटमा नुवाकोट १० खेलाडीमा सीमित भयो । नुवाकोटका गोलरक्षक सुदिप गिरीले रातो कार्ड पाए । डि बक्स भित्र आर्मीका रिपु भुलानलाई लडाएपछि रेफ्रीले उनलाई पहिलो कार्ड दिदै आर्मीलाई पेनाल्टी दिएका थिए । तर रेफ्रीसँग विवाद गरेपछि गोलरक्षक गिरीले रातो कार्ड पाए ।
गिरीले रातो कार्ड पाएपछि खेलमा केही बेर विवाद उत्पन्न भएको थियो । नुवाकोटले रेफ्रीको निर्णयप्रति असन्तुष्टि जनाउदै केही बेर विवाद गरेको थियो । विवादका कारण खेल १० मिनेट रोकियो । वैकल्पिक गोलरक्षक नहुदा नुवाकोटका स्ट्राइकर सन्दीप राना मगरले गोलपोष्ट सम्हाले । प्राप्त पेनाल्टीमार्फत दोस्रो गोल गर्दै सुशान्तले आर्मीलाई खेलमा फर्काए । १० खेलाडीमा सीमित नुवाकोटले आर्मीलाई निर्धारित समयमा बराबरीमा रोक्यो । खेलको म्यान अफ दि म्याच आर्मीका सुशान्त चौधरी भए ।
उपाधीका लागि आर्मीले बिहीबार हुने दोस्रो सेमिफाइनल खेलको बिजेतासँग खेल्नेछ । बिहीबार अफ्रिकन रूट्स एसोसिएसन (एआरए) र बागमती युवा क्लब सर्लाही फाइनल प्रवेशका लागि भिड्दैछ्न् ।

- ADVERTISEMENT -
- ADVERTISEMENT -