नक्कली प्रेस कार्डसहित एकजना पक्राउ

चितवन / नक्कली परिचय पत्र देखाई आफू पत्रकार बताउने एकजनालाई प्रहरीले पक्राउ गरेको छ । भरतपुर ३ पुल्चोकमा चेकजाँच गर्ने क्रममा उक्त व्यक्तिलाई पक्राउ गरिएको जिल्ला प्रहरी कार्यालय चितवनका प्रहरी प्रवक्ता सरोज गिरीले जानकारी दिए ।
प्रवक्ता गिरीका अनुसार पक्राउ परेका व्यक्ति गैंडाकोट–५ का २२ वर्षीय विजय लामिछाने हुन् । पक्राउ परेका लामिछानेले गैँडाकोटस्थित आमा डिजिटल फ्लेक्स प्रिन्टको कार्डमा प्रेस लेखेको परिचयपत्र भिरेको थियो ।
चेकजाँच क्रममा लामिछानेले रिपोर्टर हुँ भन्दै देखाएको परिचयपत्र शंका लागि सोधपुछ गर्दा कुनै सञ्चारमाध्यमको सम्वाददाता नभएको प्रहरीले पुष्टि गरेको छ । पक्राउ परेका व्यक्तिमाथि थप अनुसन्धान भइरहेको उनले बताए ।
पछिल्लो समय कोरोनाको दोस्रो लहरसँगै भएको निषेधाज्ञापछि बजारमा नक्कली पत्रकारको बिगबिगी बढ्दै गएको छ ।