चितवनमा निषेधाज्ञा थप, जेठ २७ गतेसम्म जारी

बबिलाल तामाङ

प्रकाशित मिति : २०७८ जेष्ठ १९ गते

चितवन / चितवनमा पुनः एक हप्ता निषेधाज्ञा थप गरिएको छ । आगामी जेठ २७ गते राति १२ बजेसम्म निषेधाज्ञा थप गरिएको एक सूचना मार्फत जिल्ला प्रशासन कार्यालय चितवनले जनाएको छ ।
जिल्ला कोभिड–१९ संकट व्यवस्थापन केन्द्र (डीसीसीएमसी)ले एक साता निषेधाज्ञा थप्न सिफारिस गरेपछि प्रशासनले निषेधाज्ञा थप गर्ने निर्णय गरेको हो । दोस्रो पटक थप गरिएको निषेधाज्ञाको अवधि भोलि बिहीबार रातिबाट सकिदैछ ।
जिल्ला प्रशासन कार्यालय चितवनले गत वैशाख १६ गतेरातिदेखि लागू हुने गरी वैशाख मसान्तसम्म निषेधाज्ञा जारी गरेको थियो । त्यस्तै जेठ १३ गते राति १२ बजेसम्म लागू हुने गरी निषेधाज्ञा लम्ब्याइएको थियो भने कोरोना संक्रमणको दर नघटेपछि जेठ २० गते राति १२ बजेसम्म लागू हुने गरी थप गरिएको थियो ।