दुई ट्रक ठोक्किए : दुई जनाको मृत्यु

मकवानपुर / हेटौंडा–१५ रातोमाटेमा दुई वटा ट्रक ठोक्किएर दुर्घटना हुँदा दुई जनाको मृत्यु भएको छ भर्ने अर्का दुई जना घाइते भएका छन् ।
पूर्व पश्चिम राजमार्ग सडक खण्ड अन्तर्गतको रातमाटेमा वीरगञ्जबाट हेटौंडातर्फ आउँदै गरेको प्लास्टिकको सामान बनाउने मेसिन बोकेको ना ५ ख ५९६३ नम्बरको ट्रकले सोही दिसाबाट चामल बोकेर आउँदै गरेको ना ५ ख १८६४ नम्बरको ट्रकलाई ठक्कर दिँदा दुर्घटना भएको प्रहरीले जनाएको छ ।
दुर्घटनामा मृत्यु हुनेमा अन्दाजी ३० र ३५ वर्षका ठक्कर दिने ट्रकको चालक र सहचालक रहेको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक (डिएसपी) जयश्वर रिमालले जानकारी दिए । उनीहरुको पहिचान भने खुल्न सकेको छैन ।
दुर्घटनामा घाइते भएका उनीहरुको उपचारको क्रममा हेटौंडा–१ मा रहेको सन्चो अस्पतालमा मृत्यु भएको डिएसपी रिमालले जानकारी दिए ।
दुर्घटनामा ना ५ ख १८६४ नम्बरको ट्रक चालक बारा कोल्हवी–१० का ५० बर्षीय ध्रुव चौधरी र सोही ट्रकका सहचालक रौतहट गजुरा –८ का २० बर्षीय बिकेस चौधरी घाइते भएका छन् । उनीहरुको चुरेहिल अस्पतालमा उपचार भईरहेको जनाइएको छ ।