सन्तोषी सुब्बा प्रकरणः प्रतिकार गर्दा हत्या भएको खुलासा

काठमाडौं / काठमाडौंको दक्षिणकाली शौचालयमा मृत अवस्थामा भेटिएकी सन्तोषी सुब्बाको जबरजस्ती करणी गर्ने क्रममा प्रतिकार गर्दा हत्या भएको खुलेको छ । मृत अवस्थामा भेटिएकी सुब्बाको जरबरजस्ती गर्नेक्रममा प्रतिकार गर्दा घाँटी थिचि मृतकको सलले घाँटीमा बेरी हत्या गरेको खुलेको प्रहरीले आज पत्रकार सम्मेलनमा जानकारी दिएको छ ।
प्रहरीले सुब्बाको हत्या गरेको अभियोगमा पक्राउ परेका सिन्धुपाल्चोकको चौतारा साँगाचोकगढी १४ घर भइ दक्षिणकाली नगरपालिका ७ बस्ने २९ वर्षीय सुरेश तिमल्सिनालाई बिहिबार सार्वजनिक गर्दै प्रहरीले उक्त कुराको जानकारी गराएको हो ।
पक्राउ परेका सुरेशले हत्या पश्चात अनुहारमा पटक–पटक ढुंगाले प्रहार गरी फरार भएको पाइएको पनि प्रहरी अनुसन्धानबाट खुलेको पत्रकार सम्मेलनमा जानकारी दिएको छ ।
गत असार ६ गते दक्षिणकाली पुगेकी सन्तोषीले सुरेश तिमल्सिनासँग खाने र बासको समस्या भएको बताएपश्चात अभियुक्तले खाना र सुत्ने व्यवस्था मिलाइदिन्छु भन्दै दक्षिणकाली मन्दिर नजिकै जंगलमा पुर्याएका थिए । पिकनिक स्थलमा रहेको सार्वजनिक शौचालय नजिक उनको शव फेला परेको थियो ।
मृतक सुब्बा पशुपंक्षीको आवाज निकालेर युट्युबमा भाइरल बनेकी थिइन् ।