भेरोसेल खोपको दोस्रो डोज असार २२ गतेदेखि

काठमाडौं / कोरोना भाइरसविरूद्धको ‘भेरोसेल’ खोपको दोस्रो डोज असार २२ गतेदेखि लगाइने भएको छ । सरकारले चीनबाट अनुदानमा आएको १० लाख डोज खोपको पहिलो मात्रा गत जेठ २५ गते लगाएको थियो ।
भेरोसेल खोपको दोस्रो डोज असार २२ गतेदेखि लगाइने भएको खोप शाखाका प्रमुख डा. झलक गौतमले जानकारी दिए । उनका अनुसार, उक्त खोपको पहिलो डोज झन्डै ४ लाख मानिसहरूले लगाएका थिए ।
चिनियाँ कम्पनी सिनोफार्मले विकास गरेको यो खोप यसअघि पनि सरकारले ८ लाख डोज लगाएको थियो । उक्त खोप पनि चीनले अनुदानमै दिएको थियो ।
चिनियाँ खोप लगाएकाहरूले दोस्रो मात्रा पनि लगाउन पाइरहे पनि भारतमा उत्पादन भएको कोभिसिल्ड खोप भने झन्डै १३ लाख मानिसले दोस्रो डोज लगाउन बाँकी छ । तर खोप आयात हुन नसक्दा दोस्रो डोज पाउने अनिश्चित बनेको हो ।