चितवनमा थप ६६ संक्रमित, ५६ जना कोरोनामुक्त

चितवन / चितवनमा पछिल्लो २४ घण्टामा ६६ जनामा कोरोना भाइरस संक्रमण पुष्टि भएको छ । संक्रमित मध्ये ५९ जना पिसिआर परीक्षण र ७ जना एन्टिजेनबाट पुष्टि भएको स्वास्थ्य कार्यालय चितवनले जनाएको छ ।
संक्रमितहरु मध्ये भरतपुर महानगरपलिकाका मात्रै ४५ जना छन् । यस्तै खैरहनी नगरपालिकाका ७, रत्ननगरका १०, राप्तीका १ र कालिकाका ३ जना रहेका छन् । अहिलेसम्म जिल्लाभर कुल संक्रमितको संख्या १६ हजार ५११ पुगेको छ ।
यस्तै पछिल्लो २४ घण्टामा ५६ जना निको भएका छन् । यससँगै कोरोनामुक्त हुनेको संख्या १४ हजार ९९७ पुगेको कार्यालयले जनाएको छ । १ हजार २२९ जना अझै आइसोलेसनमा छन् । उनीहरु मध्ये एक हजार ९८ जना होम आइसोलेसनमा छन् भने ९९ जना अस्पताल तथा ३२ जना संस्थागत आइसोलेसनमा छन् ।
यस्तै चितवनमा हालसम्म कोरोना संक्रमणबाट २८१ जनाको मृत्यु भएको छ । पछिल्लो २४ घण्टामा चितवनमा कोरोनाबाट एक जनाको मृत्यु भएको छ ।