July 13, 2024

चितवनमा आज र भोलि दोस्रो मात्राको रुपमा ‘एस्ट्राजेनेका’ खोप लगाइँदै

August 12, 2021

चितवन / गत वर्ष २०७८ फागुन २३ देखि चैत १ गतेसम्म कोभिसिल्ड खोपको पहिलो मात्रा लगाएकालाई दोस्रो मात्रा खोप दिइने भएको छ । आज साउन २८ र भोली २९ गते दोस्रो मात्रा खोप दिन लागिएको हो । स्वास्थ्य कार्यालय चितवनले दिएका जानकारी अनुसार कोभिड–१९ खोप समन्वय तथा अनुगमन समिति चितवनको साउन २२ गतेको निर्णय अनुसार कोभिसिल्ड खोपको पहिलो मात्रा लगाएकाहरुलाई दोस्रो मात्रा दिन लागिएको हो ।
दोस्रो मात्रा लगाउन बाँकी रहेका लक्षित समूहका व्यक्तिहरुले आआफ्नो वडाको स्वास्थ्य संस्था वा खोप केन्द्रमा गई सेवा लिन सक्ने कार्यालय प्रमुख दिपकप्रसाद तिवारीले बताए । उनले खोप लगाउन आउँदा अनिवार्य माक्सको प्रयोग गर्न, खोप कार्ड र परिचयपत्र लिएर आउने, सामाजिक दूरी कायम गरी पालोमा बस्ने र खोप केन्द्रमा भिडभाड नगर्न अनुरोध समेत गरे । सो समूहमा ६५ वर्षमाथिका बृद्धाबृद्धाले कोभिसिल्ड खोप लगाएका थिए ।
भुटान र जापानबाट ‘एस्ट्राजेनेका’ खोप आइसकेपछि मन्त्रालयले कोभिसिल्डका रूपमा उक्त खोप लगाउन थालेको हो । कोभिसिल्ड र एस्ट्राजेनेका खोप एउटै कम्पनी र एउटै सूत्रमा बनेकाले लगाउँदा केही फरक नपर्ने जनाउँदै कोभिसिल्डको पहिलो मात्रा लगाएका ज्येष्ठ नागरिकलाई दोस्रो मात्राका रूपमा एस्ट्राजेनेका लगाईने मन्त्रालयले जनाएको छ । करिब साढे चार महिनापछि कोभिसिल्डको पहिलो मात्रा लगाएका ज्येष्ठ नागरिकले दोस्रो मात्रा लगाउन पाएका हुन् ।
भुटानबाट २ लाख ३० हजार र जापानबाट ५ लाख १३ हजार खोप आइसकेपछि ज्येष्ठ नागरिकलाई खोप प्रदान गरिएको हो । गत फागुन र चैतमा ‘कोभिसिल्ड’ को पहिलो मात्रा लगाइएको थियो । तर दोस्रो मात्राका लागि खरिद गरिएको खोप भारतबाट नआएपछि ती ज्येष्ठ नागरिकले खोप लगाउन पाएका थिएनन् ।
कोभिसिल्ड उत्पादक भारतीय कम्पनी सिरम इन्स्टिच्युट र कोभ्याक्स सुविधा दुवैले तत्काल ‘कोभिसिल्ड’ खोप दिन नसक्ने जनाएपछि मन्त्रालयले ‘कोभिसिल्ड’ को सट्टामा त्यस्तै प्रकृतिको खोप ‘एस्ट्राजेनेका’ दिने निर्णय गरेको थियो ।

- ADVERTISEMENT -
- ADVERTISEMENT -