फलाम बोकेको ट्रक दुर्घटना : एकको मृत्यु, दुई घाइते

मकवानपुर / मकवानपुरको भीमफेदी गाउँपालिका १ सानुटारमा सवारी दुर्घटना भएको छ । आज (शुक्रबार) बिहान भएको सवारी दुर्घटनामा एक जनाको मृत्यु भएको छ भने अर्का दुई जना घाइते भएको जिल्ला प्रहरी कार्यालय मकवानपुरले जनाएको छ ।
प्रहरीका अनुसार फलाम बोकेर काठमाडौंतर्फ जाँदै गरेको प्रदेश १–०२–००१ ख ८७५९ नम्बरको आईचर ट्रक आफै अनियन्त्रित भई राप्ती खोलामा खसेर दुर्घटना भएको हो ।
दुर्घटनामा परी मृत्यु हुनेमा सिन्धुली बस्ने वर्ष २८ को भोजराज बस्नेत रहेको मकवानपुरका प्रहरी नायव उपरीक्षक जयश्वर रिमालले जानकारी दिए । उनका अनुसार बस्नेतको घटनास्थलमै मृत्यु भएको हो ।
त्यस्तै, सोही दुर्घटनामा परी अन्य दुई जना घाइते भएका छन् । घाइते हुनेहरुमा ट्रक चालक मोरङको सुन्दरहरैचा गाउँपालिका वडा नम्वर ८ बस्ने ३१ वर्षीय राजन बास्कोटा र सह–चालक सोही ठाउँ बस्ने २४ वर्षीय सरोज आचार्य रहेका छन् ।
घाइते चालकको हेटौंडा–११ स्थित चुरेहिल अस्पतालमा उपचार भइरहेको छ भने सहचालकको चुरेहिलमा उपचारपश्चात थप उपचारको लागि काठमाडौं रिफर गरिएको प्रहरी नायव उपरीक्षक रिमालले बताए ।