चितवनको रत्ननगर अस्पतालमा मृगौलाको सफल शल्यक्रिया

चितवन / बकुलहर रत्ननगर अस्पतालमा मृगौलाको सफल शल्यक्रिया गरिएको छ । राप्ती नगरपालिका गड्यौलीकी ५५ वर्षीय सीता राईको खराब भएर काम नगर्ने अवस्थामा रहेको एउटा मृगौला बिहीबार शल्यक्रिया गरेर निकालिएको अस्पतालका मेडिकल सुपरिटेण्डेन्ट डाक्टर विश्वबन्धु बगालेले जानकारी दिए ।
शल्यक्रियामा डाक्टर सरोज गिरीको नेतृत्वमा डाक्टर दिपेन्द्रकुमार मल्लीक, डाक्टर अस्मिता पौडेल, चिनमाया श्रेष्ठ, समिता थनेत लगायतको टोलीको सहभागिता थियो । अस्पतालमा पहिलो पटक मृगौलाको शल्यक्रिया गरिएको हो ।
पछिल्लो समय आफ्नो सेवा विस्तारमा फड्को मार्दै आइरहेको अस्पतालले सेवा विस्तारलाई निरन्तरता दिदै जटिल मानिने मृगौलाको शल्यक्रिया गर्न पनि सुरुवात गरेको डाक्टर गिरीले जानकारी दिए । लामो समयदेखि मृगौलाका बिरामीको डायलासिस गर्दै आइरहेकोे अस्पतालले डायलासिसको लागि चाहिने एबी फिस्टुला बनाउने सेवा पनि सुरु गरिएको डाक्टर गिरीको भनाइ छ ।
पुर्वी चितवनका ४ नगरपालिकालाई लक्षित गर्दै सेवा दिइरहेको बकुलहर रत्ननगर अस्पतालले एक वर्ष अघि शल्यक्रिया सेवा सुरु गरेको थियो । अस्पतालले हाल विरामीलाई पित्तथैलीको शल्यक्रिया, एपेन्डीसको सल्यक्रिया, पत्थरीको सल्यक्रिया, हर्नियाको शल्यक्रिया, आन्द्राको शल्यक्रिया लगायतको सेवा दिँदै आइरहेको छ ।
अस्पतालले पित्त थैलीको क्यान्सरको शल्यक्रिया, नशाको शल्यक्रिया लगायतको सेवा पनि थप्ने तयारी गरिरहेको जनाएको छ । छिट्टै आईसीयू, पीआईसीयू र एनआईसीयू सञ्चालनमा गर्ने तयारी गरिरहेको अस्पतालले दैनिक छ सयभन्दा बढी विरामीलाई सेवा दिइरहेको अस्पतालले जनाएको छ ।