‘कमेडी च्याम्पियन–२’ को उपाधि भरतमणिको पोल्टामा

काठमाडौं / चर्चित रियालिटी शो ‘कमेडी च्याम्पियन–२’ शनिबार राति सम्पन्न भएको छ । उक्त शो मा इलामका भरतमणि पौडेल विजयी बनेका छन् । कडा प्रतिस्पर्धा बीच पौडेल रियालिटी शो ‘कमेडी च्याम्पियन–२’ को उपाधि जित्न सफल भएका हुन् ।
उनका प्रतिस्पर्धीद्वय विक्की अग्रवाल र सन्तोष थापालाई हराउँदै पौडेलले शनिबार राति भएको फाइनलमा उपाधि जित हात पारेका हुन् ।
पौडेलले पूर्वसञ्चारमन्त्री गोकुलप्रसाद बाँस्कोटा, पूर्व युवराज पारस शाह, घरबेटीजस्ता प्रस्तुति दिएर निकै चर्चामा आएका हुन् । उपाधिसँगै पौडेलले कार र २५ लाख नगदसमेत पाएका छन् । आफ्नो भोगाइ मिसाएर समय सान्दर्भिक सामाजिक तथा राजनीतिक व्यंग्य गर्ने उनको खुबीलाई दर्शकले अत्यधिक रूचाएका थिए ।
यस्तै भारत सिक्किमका विक्की अग्रवाल दोस्रो भए । उनले मोटरसाइकल पुरस्कार पाएका छन् । त्यस्तै गोरखाका सन्तोष थापा तेस्रो भएका छन् भने उनले स्कुटर जित्न सफल भएका छन् ।