अक्षय कुमारको नयाँ फिल्म ‘गोरखा’ घोषणा

मुम्बई / बलिउड अभिनेता अक्षय कुमारले विजया दशमीको अवसर पारेर नयाँ फिल्मको घोषणा गरेका छन् । उनले सामाजिक सञ्जालमार्फत नयाँ फिल्म ‘गोरखा’ को फस्र्ट लुक पोस्टर शेयर गरेका छन् ।
उक्त फिल्ममा आफूले मेजर जनरल इयान कार्डोजोको भूमिका निर्वाह गर्ने समेत अक्षय कुमारले घोषणा गरेका छन् ।
अक्षय कुमारले फस्र्ट लुकमा फिल्मका पोस्टरका दुई तस्बिरहरु ट्वीट गर्दै लेखेका छन्– ‘कहिलेकाहिं तपाईंको अघिल्तिर यस्ता प्रेरक कथाहरु आउँछन्, तपाईंले त्यसलाई बनाउन चाहनु हुनेछ । गोरखा–महान युद्ध नायक मेजर जनरल इयान कार्डोजोको जीवनमा आधारित त्यस्तै एउटा फिल्म हो । यी आइकनको भूमिका निर्वाह गर्न तथा यो विशेष फिल्मलाई प्रस्तुत गर्न पाउँदा सम्मानित महसुस गरिरहेको छु । सञ्जय चौहानद्वारा निर्देशन गरिने फिल्म ।’
महान युद्ध नायक मेजर जनरल इयान कार्डोजोको जीवनमा आधारित ‘गोरखा’ को निर्देशन संजय पूरन सिंह चौहनले गर्नेछन् । मेजर जनरल इयान कार्डोजो एक पूर्व भारतीय सेना अधिकारी हुन्, जो एक बटालियन तथा एक ब्रिगेडको नेतृत्व गर्ने भारतीय सेनाको पहिलो युद्ध–दिव्यांग अधिकारी बनेका थिए ।
युद्धमा लागेको चोटका कारण उनले विच्छेदन (अंग हटाउने प्रकृया) गर्नु परेको थियो र सन् १९८४ मा ब्रिगेडियरको रुपमा पदोन्नती हुने क्रममा उनको एउटा खुट्टा काठको थियो ।
इयान कार्डोजोले सन् २००५ देखि २०११ सम्म भारतीय पुनर्वास परिषदको अध्यक्षको रुपमा पनि काम गरेका थिए । आफ्नो खुट्टा काटिए पनि पूर्व भारतीय सेना अधिकारी नियमित रुपले मुम्बई म्याराथनमा भाग लिइरहेका छन् ।