बेपत्ता चापागाईको शव फेला, प्रहरीद्वारा आफन्तको जिम्मा

चितवन / भरतपुर महानगरपालिका वडा नं. २८ निउरे चोकस्थित नारायणी नदीमा एक वृद्धको शव फेला परेको छ । भरतपुर महानगरपालिका वडा नं. १० बस्ने वर्ष ६४ का नुमाकान्त चापागाईको शव उक्त स्थानमा फेला परेको जिल्ला प्रहरी कार्यालय चितवनले जनाएको छ ।
प्रहरीका अनुसार गत कार्तिक ४ गते साँझ ५ बजे परिवारबाट बेपत्ता भएको भनी उजुरी परेको थियो । बेपत्ता भएका चापागाईको सोही दिन बेलुका ८ बजे पुल्चोकबाट गैंडाकोटतर्फ गएको सिसि टिभी फुटेज प्राप्त भएको बताइएको छ ।
प्रहरीले निज चापागाई फर्केको कुनै फुटेज नभएको र गैंडाकोट पनि पुगेको नदेखिएकोले नारायणी नदी किरानामा खोतलास गर्ने क्रममा कार्तिक ६ गते करिब ४ बजेतिर शव फेला पारेको हो । उक्त शवको मुचुल्का तथा कानुनी कार्य सम्पन्न गरी शव आफन्तको जिम्मा लगाइएको कार्यालयले जनाएको छ ।