–प्रमिला तामाङ
चितवन / तामाङ पत्रकार संघ जिल्ला शाखा चितवनले आगामी २०७८ सालको ‘लोछार’लाई लक्षित गर्दै स्मारिका प्रकाशन गर्ने भएको छ । कार्तिक १५ गतेको तेस्रो अधिवेशनबाट सर्वसम्मत चयन भएका कार्यसमितिको पहिलो तथा कार्यविधिसहितको बैठकले सो निर्णय गरेको हो ।
उक्त पहिलो बैठकमा वार्षिक कार्ययोजना बारेमा छलफल गरिएको संघका अध्यक्ष बबिलाल तामाङले जानकारी दिए । आगामी दिनमा तामाङ समुदायलाई लक्षित गरी विविध कार्यक्रम ल्याइने अध्यक्ष तामाङले बताए ।
उनले तामाङ समुदायमा अझै पनि मातृ भाषाको ज्ञानको अभाव भएकाले तामाङ भाषा शिक्षण कार्यक्रम ल्याइने बताए । तामाङ भाषा शिक्षण कार्यक्रमबाट थोरै भए पनि तामाङ समुदायमा मातृ भाषाको ज्ञान नभएकाहरु लाभान्वित हुने उनको भनाइ छ । उक्त कार्यक्रमले भाषाको संरक्षण, सम्बद्र्धन र भाषा जगेर्नामा थप बल पुग्ने उनको विश्वास छ ।
बैठकमा संघले पहिलो पटक अक्षय कोष स्थापना समेत गर्ने निर्णय गरेको छ । उनका अनुसार यसअघि थालनी गरिएको भए तापनि समय प्रतिकूलताले पूर्णता पाउन नसकेको हो । उक्त अक्षय कोषलाई असहाय, वृद्धवृद्धा तथा अन्य सामाजिक सेवामा लगाइने उनले बताए ।
यस्तै एसईईमा उत्कृष्ट तामाङ समुदायका छात्रछात्राहरुलाई सम्मान, सामाजिक सेवाभावले रक्तदान कार्यक्रम, तामाङ फिल्म च्यारिटी शो गरिने छ । संघले वर्षेनी भित्तेपात्रो (क्यालेण्डर) प्रकाशन गर्दै आएको छ भने तामाङ प्रसारण दिवसलगायत यसअघि सम्पन्न गरिँदै सबै कार्यक्रमलाई निरन्तरता दिइने बताइएको छ ।
तामाङ पत्रकार संघ चितवन २०७० सालमा स्थापना भएको हो । हाल चितवनका विभिन्न मिडियाहरुमा १८ जना बढी तामाङ पत्रकारहरु आवद्ध छन् ।
