विद्युत उत्पादन नहुँदा कुलेखानीमा ‘ओभर फ्लो’

मकवानपुर / मानव निर्मित इन्द्रसरोवर ताल (कुलेखानी जलाशय) भरिएर ओभर फ्लो भएको छ । २०७२ सालपछि पहिलो पटक ३ सय मिटर चौडाइ, ७ किलोमिटर लम्बाइ र ८ करोड ५३ लाख घनमिटर क्षमताको कुलेखानी जलाशय भरिएर ओभर फ्लो भइरहेको हो । जलाशयबाट ३ वटा जलविद्युत आयोजना सञ्चालन भइरहेको छ । कुलेखानी प्रथम ६० मेगावाट, दोस्रो ३२ मेगावाट र तेस्रो १४ मेगावाट क्षमताको जलविद्युत आयोजना सञ्चालनमा छन् । हाल तीनै वटा आयोजना संचालन नभएकोले जलाशय भरिएर पानी (ओभर फ्लो ) भएको हो ।
कुलेखानी प्रथम जलविद्युत आयोजनाका प्रमुख धिरेन्द्र चौधरीका अनुसार नेपाल विद्युत प्राधिकरणको मुख्य ‘ब्याकअप’का रपमा रहेको कुलेखानी जलाशयमा संकलित पानीबाट हाल विद्युत उत्पादन गर्नुपर्ने अवस्था छैन । कुलेखानी जलविद्युत आयोजना ‘पिक आवर’मा मात्र सञ्चालन हुने उनले जानकारी दिए । आवश्यकता हेरेर दैनिकजसो २/३ घण्टामात्रै संचालन हुने गरेको कुलेखानीमा बिगत १ महिनादेखि पानी भरिएर ओभर फ्लो भइरहेको हो ।
कुलेखानी जलाशयमा १ हजार ५३० मिटर उचाइसम्म पानी संकलन गर्न सकिन्छ । भूकम्प जानुअघि कुलेखानी जलाशयमा क्षमताभन्दा बढी पानी संकलनका लागि बाँधमा बालुवाको बोरा राखिन्थ्यो । २०७२ को भूकम्पले बाँधमा क्षति पुगेपछि भने बालुवाको बोरा राखेर पानी संकलन गर्न छाडिएको चौधरीले जानकारी दिए ।