नेपालमा थप २१३ मा कोरोना संक्रमण पुष्टि, ३ जनाको मृत्यु

काठमाडौं / पछिल्लो २४ घण्टामा नेपालमा थप २१३ जनामा कोरोना भाइरस संक्रमण पुष्टि भएको छ । स्वास्थ्य तथा मन्त्रालयका अनुसार पछिल्लो २४ घण्टामा पीसीआर विधिबाट ४ हजार ९०७ र एन्टिजेन विधिबाट १ हजार ७२५ जनामा परिक्षण गर्दा २१३ जनामा कोरोना संक्रमण देखिएको हो ।
यससँगै कुल संक्रमितको संख्या पीसीआरबाट ८ लाख २० हजार ७२४ र एन्टिजेनबाट ९५ हजार ४६८ जना पुगेको छ । यस्तै, आज थप ३२५ जना कोरोना संक्रमण मुक्त भएका छन् । यससँगै कुल कोरोना संक्रमण मुक्त हुनेको संख्या ८ लाख २ हजार ४७ जना पुगेको छ । निको हुने दर ९७।७ प्रतिशत रहेको छ ।
यस्तै कोरोना संक्रमणबाट थप ३ जनाको मृत्यु भएको छ । नेपालमा कोरोनाबाट ज्यान गुमाउनको कुल संख्या ११ हजार ५२१ पुगेको छ । हाल देशभर सक्रिय संक्रमितको संख्या ७ हजार १५६ रहेको छ ।