चितवनमा आफ्नै श्रीमतीको हत्या गर्ने पक्राउ

चितवन / श्रीमतीको हत्या गरेको आरोपमा एक जनालाई प्रहरीले पक्राउ गरेको छ । भरतपुर महानगरपालिका–६ अमरबस्तीकी २२ वर्षीया अम्बिका महतोलाई कुटपिट गरी हत्या गरेको आरोपमा एक जनालाई पक्राउ गरिएको जिल्ला प्रहरी कार्यालय चितवनका प्रवक्ता नरहरि अधिकारीले जानकारी दिए ।
प्रवक्ता अधिकारीका अनुसार पक्राउ पर्नेमा मृतक महतोका श्रीमान २५ वर्षीय साजन महतो हुन् । मृतकको शरीरमा घाउ चोट लागेको र घटनाको प्रकृति अस्वभाविक भएकोले अनुसन्धान अघि बढाइएको उनले बताए । अनुसन्धानको क्रममा अम्बिकालाई उनकै श्रीमान साजनले कुटपिट गरी हत्या गरेको खुल्न आएको प्रहरी प्रवक्ता अधिकारीले जानकारी दिए ।
मृतक अम्बिका रातको समयमा घर छेउमै लडेको अवस्थामा फेला परेकी थिइन् भने अर्को दिन बिहान आफन्तले देखेपछि उपचारका लागि भरतपुर अस्पताल पुर्याइएको हो । उनलाई पुस ६ गते पक्राउ गरी ज्यान सम्बन्धी कसुरमा चितवन जिल्ला अदालतबाट म्याद थप गरी अनुसन्धान भइरहेको प्रहरीले बताए ।