महाबौद्ध गुम्बामा सांस्कृतिक प्रतियोगितासहित ल्होसार पर्व मनाइने

चितवन / भरतपुर बाइपासरोडस्थित महाबौद्ध गुम्बामा गुरुङ समुदायको महान पर्व ल्होसार भव्यसाथ मनाउने तयारी भएको छ । कोभिड महामारीको जोखिम कायम नै रहेकोले यसपटक एकदिन अर्थात पुष १५ गते मात्रै पर्व मनाइने तयारी भएको आयोजक तमू ह्युल छोँज् धीँ गुरुङ राष्ट्रिय परिषदका अध्यक्ष गणेश गुरुङले जानकारी दिए ।
गुरुङ समुदायको भाषा, संस्कृति र संस्कारको संरक्षण गर्न तमू ल्होसार पर्व मनाइने भएको हो । यो वर्ष सांस्कृतिक प्रतियोगिता सहित मनाउने गरी तयारी तीव्र पारिएको उनले बताए । गुरुङ जातीको नयाँ वर्ष समेत सुरु भई गाई वर्गको विदाई र बाघ वर्गको स्वागत गर्ने भएकाले कार्यक्रम भव्य हुने साथै गुरुङ भाषा भेषभुषा सहितको सांस्कृतिक प्रतियोगिता राखिएको गुरुङले बताए ।
चितवन जिल्लाभरका गरी करिव १५ समूहको प्रतियोगितामा सहभागीता हुने र अहिलेसम्म १० समूहले नाम दर्ता गराइसकेका छन् । प्रतियोगितामा प्रथम हुनेलाई १० हजार, द्धितीय हुनेलाई ७ हजार, तृतीय हुनेलाइ ५ हजार र सान्तवता हुने दुइ समूहलाई २÷२ हजारका दरले पुरस्कृति गरीने गुरुङले जानकारी दिए । प्रतियोगितामा गुरुङ समुदायको भेषभुषा,भाषा, शब्द आदिलाई प्राथमिकतामा राखेर निर्णायकहरुले दिएको नम्वरका आधारमा विजेता छनौट गरिनेछ ।
त्यस्तै जयबुद्ध अस्पतालको सहयोगमा निशुल्क स्वास्थ्य परीक्षण समेत गरिने आयोजकले जानकारी दिएको छ । साथै सोही दिन जयवुद्ध अस्पतालको सहयोगमा निशुल्क स्वास्थ्य परीक्षण, छेलो फ्याँक्ने,रस्साकस्सी,घैँटो फुटाई प्रतियोगिता समेत आयोजना गरिएको आयोजकले जनाएको छ। तयारीस्वरुप गुम्बामा सजिसजावट र लुङ्दा टाँग्ने कार्य समेत गरिनेछ ।
सो अवसरमा विभिन्न राजनीतिक दलको नेतृत्व तहमा गुरुङ समुदायबाट पुग्नुभएका व्यक्तिहरुलाई सम्मान समेत गर्ने कार्यक्रम रहेको सचिव भैँखु गुरुङले जानकारी दिनुभयो। कार्यक्रम सम्पन्न गर्न १ लाख ४३ लाख रुपैया लाग्ने अनुमान गरिएको छ । कार्यक्रमको बागमती प्रदेशका उद्योग वाणिज्य तथा आपूर्ति मन्त्री मिलनबाबु श्रेष्ठले उद्घाटन गर्ने तय भएको छ ।