विवादित रियलस्टेट कम्पनी : ३९ वटा भवन भत्काउन चीन सरकारको निर्देशन

सीएनएन / लामो समयदेखि विवादमा रहँदै आएको चीनको एभरग्रान्डे रियल स्टेट कम्पनीलाई चीन सरकारले एक रिसोर्टका ३९ भवनहरु भत्काउन आदेश दिएको छ । ती भवनहरुको स्वीकृति अवैध तरिकाले प्राप्त गरिएको अभियोगमा आधिकारिक निकायले यस्तो निर्देशन दिएको बताइएको छ ।
कम्पनीले यो खबरलाई स्वीकार गरिसकेको छ तर त्यही परियोजना मार्फत निर्माण गरिएका अन्य भवनहरु चाहिँ यसबाट प्रभावित नभएको दाबी पनि गरेको छ । उक्त रिसोर्टमा निर्मित भवनका झन्डै ६१ हजार घर मालिक छन् ।
ती ३९ भवनहरु एभरग्रान्डेको ओसन फ्लावर प्रोजेक्ट अन्र्तगत रहेको थियो जसमा कम्पनीले पछिल्लो ६ वर्षमा झन्डै १३ अर्ब डलर लगानी गरेको हो ।
एभरग्रान्डे चीनको दोस्रो सबैभन्दा ठूलो सम्पति निर्माता कम्पनी हो । तरपनि पछिल्ला केही महिनाहरुमा यसले ऋण तिर्न संघर्ष गर्नुपरिरहेको देखिएको छ । कम्पनीका निर्देशक छु जिआयिनले यसअघि कम्पनीको भर्पाइ गर्न आफ्नो व्यक्तिगत सम्पति बेचिरहेको खबर गरिएको थियो ।
विज्ञहरुले लामो समय अगाडिदेखि नै एभरग्रान्डे कम्पनी पतन हुनुले चीनको सम्पति बजारमा ठूलो जोखिम पैदा गर्ने चेतावनी दिँदै आएका छन् । यसले घर मालिकहरुका साथै वित्तिय प्रणालीमा पनि धेरै ठूलो क्षति पुर्याउन सक्ने बताइएको छ । यसअघि अमेरिकाको फेडेरल रिजर्भले चिनियाँ घर जग्गा उद्योगमा क्षति पुग्नुले विश्वव्यापी अर्थतन्त्रमै असर पार्न सक्ने चेतावनी दिएको थियो । -बाह्रखरीबाट ।