‘तामाङ पत्रकारिता चितवन’ स्मारिका भोलि विमोचन, नौ जना सम्मानित हुने

–प्रमिला तामाङ
चितवन । तामाङ पत्रकार संघ जिल्ला शाखा चितवनले पहिलो पटक ‘तामाङ पत्रकारिता चितवन’ स्मारिका विमोचन गर्ने भएको छ । स्थापनाको झण्डै एक दशकमा पहिलो पटक उक्त स्मारिका विमोचन गर्न लागिएको हो । संघले तामाङ समुदायको मञ्जुश्री सम्वत २८५८ औं सोनाम ल्होछारको अवसर पारेर भोलि (शनिबार) स्मारिका विमोचन गर्न लागेको हो ।
विमोचनमा नौजना विभिन्न विधाका व्यक्तित्वहरुलाई सम्मान गरिने संघका अध्यक्ष बबिलाल तामाङले जानकारी दिए । सो अवसरमा तीन जना संस्थागत, ५ जना दश हजार बढी सहयोग गर्ने दाता र १ जना पत्रकारलाई सम्मानित गरिने अध्यक्ष तामाङले बताए ।
उनका अनुसार संघले यसपटक दस्तावेजको रुपमा ‘तामाङ पत्रकारिता चितवन’ २०७८ नामक स्मारिका प्रकाशन गर्न लागेको हो । उक्त स्मारिका प्रकाशनबाट तामाङ समुदायको रितिरिवाज, भाषा, संस्कृति झल्किने विश्वास उनको छ ।
स्मारिकामा चितवन लगायत बाहिरी जिल्लाका पत्रकारहरुका लेख, स्थान परिचय, जाति परिचय, ल्होछार पर्व, कथा, कविता लगायतका विषयवस्तु समाविष्ट गरिएको छ । अध्यक्ष तामाङले प्रथम पटक स्मारिका प्रकाशनमा नै चौतर्फी सहयोग पाएकोमा सबैप्रति हार्दिक धन्यवाद तथा कृतज्ञता प्रकट गरेका छन् ।