चितवनमा आज समाजवादीको एमसीसी विरुद्ध प्रदर्शन

चितवन / नेकपा एकीकृत समाजवादीमा आवद्ध जनवर्गीय संगठनहरुको आयोजनामा चितवनको चौबीसकोठीमा आज (आइतबार) एमसीसी विरुद्ध प्रदर्शन गरिने भएको छ । भरतपुर, चौबीसकोठीमा दिनको १ बजे एमसीसी विरुद्ध प्रदर्शन गरिने आयोजकले जनाएको छ ।
पार्टीको जनवर्गीय संगठनहरुको आयोजनामा देशैभर हुने एमसीसीको विरोध कार्यक्रम अन्तर्गत चितवनमा पनि कार्यक्रम गर्न लागिएको एकीकृत समाजवादी चितवनका अध्यक्ष डा कृष्ण पन्तले जानकारी दिए । एमसीसी परियोजना राष्ट्रघाती हुने भएकाले नेपालमा यो कार्यान्वयन नगर्न दबाब दिने उद्देश्यले विरोधको कार्यक्रम राखिएको अध्यक्ष पन्तको भनाई छ ।
विरोध प्रदर्शन कार्यक्रममा एकीकृत समाजवादी जिल्ला कमिटी उपसचिव तथा भरतपुर महानगर इन्चार्ज नरेन्द्र कन्दङ्वा, युवा संघ चितवनका जिल्ला अध्यक्ष सन्दिप लामिछानेलगायतले सम्बोधन गर्ने अध्यक्ष पन्तले जानकारी दिए ।
विरोध प्रर्दशन तयारीका विषयमा पार्टीका जनवर्गीय संगठनका नेतृत्वका बीचमा शनिबार छलफल समेत भएको थियो । एकीकृत समाजवादी चितवनले विरोध प्रर्दशनमा सहभागी हुनका लागि आम सर्वसाधारण, नागरिक समाज, बुद्धिजीवी, पत्रकार, युवा, विद्यार्थी लगायत राष्ट्रहित चाहने सरोकारवालालाई आग्रह गरेको छ ।