‘मेयर नमुनासडक’मा गुणस्तरहीन सामग्री प्रयोग भएको स्थानीयको आरोप

नवलपुर / माध्यविन्दु नगरपालिका वडा नं. ७ स्थित मेयर सडकमा कालोपत्रेका क्रममा अनिमितता भएको आशंका स्थानीयले गरेका छन् । सो सडकमा गुणस्तरहीन सामग्री प्रयोग गरिएको भन्दै स्थानीय युवाहरुले ठेकेदारलाई कारबाही गर्न समेत माग गरेका हुन् ।
कालोपत्रे गरिएको सडक उप्किएको, गुणस्तरमा ध्यान नदिइएको उनीहरुको आरोप छ । ९०० मिटर सडक कालोपत्रे गर्ने जिम्मा नवलपरासीको नविन कन्सट्रक्सनलाई दिइएको बताउँदै नगरपालिकाका ईन्जिनियर माधव देवकोटाले स्थानीयको गुनासो आएपछि निर्माण कार्य रोक्न आदेश दिइएको बताए ।
स्थानीय युवाहरुले सडकको गुणस्तरको बारेमा कुरा उठाएपछि ठेकेदारलाई सो बारेमा सोधपुछ गरी काममा रोक लगाएको उनले भने ।
सडक निर्माणको जिम्मा पाएको नवीन कन्सट्रक्सनले सडकमा तत्कालै गाडी गुडाउँदा समस्या भएको बताएको छ । उक्त कन्सट्रक्सनका ठेकेदार नवीन ज्ञवालीले कालोपत्रे गर्ने क्रममा तत्कालै गाडी चलाउँदा समस्या भएको र गुणस्तरमा समस्या नभएको उनको दावी छ ।
उक्त सडक ९३ लाखको लागतमा निर्माण हुन लागेको बताइएको छ ।