पठनपाठन नियमित गर्न दबाब दिँदै राजमार्ग अवरुद्ध

हेटौंडा / हेटौंडाको एक विद्यालयमा पठनपाठन नभएको भन्दै विद्यार्थीहरुले आन्दोलन गरेका छन् । मकवानपुरको हेटौंडा उपमहानगरपालिका–११ नवलपुरस्थित त्रिभुवन माध्यमिक विद्यालयका विद्यार्थीहरूले आन्दोलन गरेका हुन् ।
उक्त विद्यालयका शिक्षकहरूले तलब नपाएको र उनीहरुले १० दिनदेखि पठनपाठन अवरुद्ध गर्दै आएको बताइएको छ । अवरुद्धका कारण विद्यार्थीहरु मारमा परेको हो ।
पठनपाठन सुचारु गर्न दबाब दिँदै विद्यार्थीहरूले पूर्व–पश्चिम राजमार्ग अवरुद्ध गरेका हुन् । झलक छत्कुलीको नेतृत्वमा विद्यार्थीले राजमार्गमा मंगलबार दिउँसो १२ बजेदेखि नाराबाजी गरेर अवरुद्ध गरिरहेका छन् ।
उनीहरुले नियमित पठनपाठन हुनुपर्ने माग गर्दै शिक्षकहरुले विद्यालयमा राजनीति गरेको आरोप लगाएका छन् । जिल्ला प्रहरी कार्यालय मकवानपुरका प्रहरी नायब उपरीक्षक जयश्वर रिमालका अनुसार घटनास्थलमा प्रहरी परिचालन गरिएको छ ।