७ लाख बराबरको गरगहनासहित एक पक्राउ

हेटौंडा / सुन र चाँदीको गरगहनासहित एक जना पक्राउ परेको छ । सात लाख बराबरको गरगहनासहित एक जना परेको जिल्ला प्रहरी कार्यालय मकवानपुरका प्रहरी नायव उपरीक्षक जयश्वर रिमालले जानकारी दिए ।
प्रनाउ रिमालका अनुसार पक्राउ पर्नेमा भारत बिहारको सितामडी थाना परिहार पोष्ट अन्धौली ३ बिसनपुर बस्ने वर्ष २२ का सोलार साह भन्ने राजा साह हुन् ।
साहलाई बिहीबार ईलाका प्रहरी कार्यालय पशुपतिनगर मकवानपुरबाट खटिएको प्रहरी टोलीले पक्राउ गरेको हो । साह भन्सार छली चोरी पैठारी गरी ल्याएको २ लाख ५ हजार २६० रुपैयाँको सुन र ४ लाख ४० हजार ८६२ रुपैयाँ चाँदीको विभिन्न गरगहनासहित पक्राउ परेका हुन् ।
पथलैयाबाट हेटौंडातर्फ आउँदै गरेको प्रदेश २–०३–०२० प ८२४५ नम्वरको मोटरसाइकललाई हेटौंडा उपमहानगरपालिका वडा नम्वर १५ राटोमाटे चेकपोष्टमा रोकी चेकजाँच गर्ने क्रममा साहलाई नियन्त्रणमा लिइएको हो । प्रहरीले साहको साथबाट तिलहरी, झुम्का, फुली, बाला, पाउँजु, सिक्री, ब्रासलेट, औठी, गणेश लक्ष्मीको मूर्ती, पाउजु लगायत गरी सुन २४ ग्रा. ६२ मिलीग्राम र २ किलो १८ ग्राम चाँदी बरामद गरेको हो ।
पक्राउ परेका साहलाई थप अनुसन्धानको लागि राजश्व अनुसन्धान कार्यालय पथलैया पठाइएको प्रहरीले जनाएको छ ।