राप्तीका उपप्रमुख लामाले दिलाए नौ जनालाई नागरिकता

राप्ती । राप्ती नगरपालिकाका उपप्रमुख इमानसिंह लामाको सनाखतमा ९ जनाले नागरिकता पाएका छन् । चितवनको राप्ती नगरपालिका वडा नं. १३ मा बस्ने उनीहरुलाई उपप्रमुख लामाले सोमबार नागरिकता दिलाएका हुन् । लामाले उनीहरुलाई जिल्ला प्रशासन कार्यालय चितवनमा उपस्थित गराई सनाखत गरी दिएका हुन् ।
प्रशासनबाट नागरिकता पाउनेहरुमा स्यानीमाया चेपाङ, मोतीमाया चेपाङ, सुरेश चेपाङ, सिरीमाया चेपाङ, मोतीलाल प्रजा, सिताराम प्रजा, झिम्कीमाया प्रजा, बबिमाया प्रजा र सुकमाया प्रजा रहेका छन् । ‘नागरिकता पाउनु हरेक नेपालीको नैसर्गिक अधिकार हो ।’ उपमेयर लामाले भने, ‘नागरिकता हुनेलाई ठूलो नलाग्न सक्छ, जसले पाएको छैन उसलाई धेरै कष्टकर छ ।’
नागरिकता नभएर सेवा सुविधाबाट बञ्चित भएका उनीहरु जस्तै अन्यलाई पनि उपमेयर लामाले सहयोग गर्दै आएका छन् । यसअघि उनले नवीन तामाङ, फुलमाया अधिकारी, बेले विक, नारायण उप्रेती, चङ्खे दराई, भिखुला दराई, जेठा परियार, कनानी चौधरी, पाल्मा चौधरीको परिवार लगायतलाई स्वयम्ले सनाखत गरी नागरिकता दिलाएका थिए ।
कपितय नागरिकता पाएकाहरुको बुबा आमाको पहिचान खुल्न नसकेको र हाल नागरिकता प्राप्त गरी सकेपछि उनीहरु निकै हर्षित भएका छन् । धेरै पटक जिल्ला प्रशासन कार्यालय धाउँदा पनि नागरिकता पाउन नसकेकाको अनुहारमा उपप्रमुख लामा खुशी बनेर छाएका छन् ।
राप्ती–१३ स्यामराङ आधारभूत विद्यालय कालीटारका विद्यालय व्यवस्थापन समितिका अध्यक्ष कृष्णबहादुर चेपाङले उपमेयर लामा गरिब तथा विपन्नहरुको सारथी बन्दै आएको बताए । ‘उहाँलाई हामी भगवान सरह नै ठान्छौ’ उनले भने, ‘असम्भव कार्यलाई पनि सार्थकता दिएर गरिब र विपन्नको आँखामा खुशी दिएका छन् ।’
अध्यक्ष चेपाङका अनुसार राक्सीराङ स्याङराङ १३ बाट दुधे नाबालक साथमा च्यापी १ घण्टा बढी कष्टकर यात्रा गरी आएकाहरुलाई भोकै दिनभर प्रशासनमा खटेर लामाले नागरिकता दिलाउने काम गरेका छन् ।