उवा–संघ चितवनको अध्यक्षमा चुननारायण र वरिष्ठ उपाध्यक्षमा सुमन निर्विरोध निर्वाचित

चितवन / उद्योग वाणिज्य संघ–चितवनको अध्यक्षमा चुननारायण श्रेष्ठ निर्विरोध निर्वाचित भएका छन् । यसअघि हरेक वर्ष चुनावी मैदानबाट प्राप्त हुने अध्यक्ष पद यस वर्ष भने श्रेष्ठले सहजै प्राप्त गरेका छन् । यस्तै वरिष्ठ उपाध्यक्ष पदमा समेत सुमनकुमार श्रेष्ठ निर्विरोध निर्वाचित भएका छन् ।
अधिवेशनको बुधबार मनोनयन दर्ताको समयमा अध्यक्ष र वरिष्ठ उपाध्यक्षमा एक÷एक जनाको मात्रै उम्मेद्वारी परेपछि उनीहरु निर्विरोध निर्वाचित भएका हुन् । निर्वाचनको सबै प्रक्रिया टुंगो लागेपछि मात्रै औपचारिक घोषणा गरिने निर्वाचन समितिका संयोजक राजकुमार श्रेष्ठले जानकारी दिए ।
श्रेष्ठको नेतृत्वमा आजै बिहान मात्र प्यानल घोषणा गरिएको थियो । श्रेष्ठ प्यानलबाटै उपाध्यक्षमा चिरञ्जिवी सुवेदी, भोजराज कौडाल र शंकर नेपाल उम्मेद्वारी दिएका छन् । यी तीन पदमा भने अन्य उम्मेद्वारी परेकाले निर्वाचन हुने संभावना बढेको छ । यद्यपी भोलि बिहानसम्म उम्मेद्वारी फिर्ताको समय रहेकोले सर्वसम्मतको संभावना कायमै छ ।
यस्तै सदस्यहरुमा भने आवश्यक पद भन्दा बढी उम्मेद्वारी परेकाले निर्वाचन हुने संभावना बलियो छ । निर्वाचन तालिका अनुसार बुधबार दिउँसो ३ बजेदेखि ५ बजेसम्म उम्मेद्वारी दर्ताको समय रहेको थियो । अन्यका पदका लागि भने फागुन ३० गते मतदानको समय तालिका रहेको छ भने चैत १ गते मतगणना हुनेछ ।