माडीको एक घर गोठमा आगलागीबाट ६० लाख बढीको धनमाल नष्ट

चितवन / माडी नगरपालिका वडा नम्बर ४ खैरहनीको एक घर गोठमा आगलागी भएको छ । आगलागीबाट दुईवटा कुखुरा फार्म, एउटा धन्सार, दुई वटा परालको टौवा पूर्ण रुपमा जलेर नष्ट भएको छ ।
आगलानी बिहान ४ः३० बजेको समयमा भएको जिल्ला प्रहरी कार्यालय चितवनले जनाएको छ । प्रहरीका अनुसार आगलागीबाट ६० लाखभन्दा बढीको धनमाल क्षति भएको छ ।
प्रहरीले आगलागीबाट धन्सारमा रहेको ७० क्विन्टल धान, पाँच क्विन्टल तोरी, दुई क्विन्टल गहुँ, ३५ क्विन्टल कुखुराको दाना नष्ट भएको बताएको छ ।
आगलागीको क्रममा एउटा फ्रिज, टेलिभिजन, डिजिटल मेसिन थान, तीन थान सोलार प्यानल, तीन वटा ब्याट्री, एउटा ईन्भटर पनि नष्ट भएका छन् । यस्तै ग्रिज, मोबिल, गियर आयल, हाईड्रोलिक पाइप, ड्रम अन्य भाडा वर्तन समेत नष्ट भएको बताइएको छ ।
आगलागी के कारणले भएको हो भन्ने खुल्न सकेको छैन । स्थानीय, नेपाल प्रहरी र नगरपालिकाको दमकलको सहयोगमा आगो नियन्त्रणमा लिईएको हो ।
घरधनी माधव लामिछानेले नगरपालिकाको दमकल समयमा नआएको, ढिलो गरी आउँदा समेत दमकलमा पानी अत्यन्त न्यून रहेका कारण आगलागी समयमा नियन्त्रणमा लिन नसकिएको बताए ।
उनले भने, ‘दमकल आउँनै ढिलो ग¥यो, आउँदा पनि निकै थोरै पानी थियो ।’ पर्याप्त पानी सहित समयमा दमकल आएको भए क्षति कम गराउन सकिने उनको भनाई थियो ।