चितवनमा म्यादी प्रहरीको लागि ११ सय बढीको दरखास्त

चितवन / चितवनका ११ सय बढीले म्यादी प्रहरीको लागि दरखास्त दिएका छन् । दर्खास्त खुलेको पहिलो दिन आइतबार ७२१ जनाले दर्खास्त दिएको जिल्ला प्रहरी कार्यालय चितवनले जनाएको छ ।
चितवनका प्रहरी प्रवक्ता नरहरी अधिकारीका अनुसार सोमबार दोस्रो दिन साँझ ५ बजे सम्ममा ३८९ जनाले गरी कुल १ हजार ११० जनाले दर्खास्त दिएका हुन् ।
प्रहरी प्रवक्ता अधिकारीले साँझ ५ बजे पछि परेका दर्खास्त समाबेश नगरिएको जानकारी दिए । आगामी बैशाख ३० गते हुने स्थानीय निर्वाचनको लागि भन्दै सरकारले आइतबारबाट म्यादी प्रहरीमा दर्खास्त खुल्ला गरेको हो । चितवन जिल्लाको लागि १७ सय ९ जना म्यादी प्रहरीका लागि दर्खास्त माग गरिएको छ । आगामी ११ गते सम्म दर्खास्तको लागि समय तोकिएको छ ।
सरकारले तोकेको मापदण्ड अनुसार म्यादी प्रहरीका लागि १८ वर्ष पुरा भई ५४ वर्ष सम्मका नेपाली नागरीकले दर्खास्त दिन पाउने छन। भर्ना भएका म्यादी प्रहरीले ४० दिन काम गर्न पाउनेछन ।
सरकारले ४० दिनसम्मको मासिक ३० हजार २४० रुपैयाँ पारिश्रमिक निर्धारण गरिएको छ । पारिश्रमिकका साथै प्रत्येक म्यादी प्रहरिले खाद्यान्नवापत ७ हजार २००,पोशाक र अन्य खर्च गर्ने गरि ६ हजार, यातायात खर्चवापत एक हजार र बिमा सुविधासमेत उपलब्ध गराइने व्यवस्था गरिएको छ ।