चक्कु प्रहार गरी सासूको हत्या गरेको आरोपमा बुहारी पक्राउ

दाङ / दाङमा सासूको हत्या गरेको आरोपमा प्रहरीले एक जनालाई पक्राउ गरेको छ । पक्राउ पर्नेमा बबई गाउँपालिका–७ की २२ वर्षीया जमुना कुँवर रहेको इलाका प्रहरी कार्यालय खिलतपुरले जनाएको छ ।
जमुनालाई ६५ वर्षीया सासू गंगी कुँवरको हत्या गरेको आरोपमा पक्राउ गरेको इलाका प्रहरी कार्यालय खिलतपुरका प्रहरी निरीक्षक नवीन चुँदालीले बताए । उनका अनुसार, जमुनाले गंगीलाई हँसिया र चक्कु प्रहार गरेर हत्या गरेको स्वीकार गरिसकेका छन् ।
प्रहरी निरीक्षक चुँदालीका अनुसार केही समय यता सासू–बुहारीबीच मनमुटाव हुँदै आएको थियो । सोही क्रममा मंगलबार सासू गंगी खेतमा काम गरेर फर्कने बेला बिहान ९ बजे जमुनाले हत्या गरेको प्रारम्भिक अनुसन्धानको क्रममा खुलेको छ ।
गंगीको शव मंगलबार शान्तिनगर गाउँपालिका–६ स्थित कोरबाङको नर्सरीमा फेला परेको थियो । मृतकका छोरा रोजगारीको सिलसिलामा स्याङजा बस्दै आएका छन् ।