चितवनमा सुरु भयो कृष्णपुर तेक्वान्दो डोजाङ र बीग डान्स स्टुडियो

चितवन / भरतपुर ७ कृष्णपुरमा ‘कृष्णपुर तेक्वान्दो डोजाङ तथा बीग डान्स स्टुडियो’ संचालनमा आएको छ । मनोरञ्जनसहित आत्मरक्षा सिकाउनेगरी भरतपुर ७ कृष्णपुरमा उक्त तेक्वान्दो डोजाङ तथा डान्स स्टुडियो संचालनमा आएको हो ।
भरतपुर महानगर खेलकुद विकास समितिका अध्यक्ष विकास श्रेष्ठले शनिबार उद्घाटन गरेका हुन् । अध्यक्ष श्रेष्ठले स–साना वालवालिकादेखि प्रतिस्पर्धामा रहने खेलाडीहरुले समेत निरन्तर अभ्यास गर्न सक्ने बताए । बाहिर पर्याप्त संरचना नहुँदा तेक्वान्दो खेलमा अभ्यास गर्न अभाव भइरहेको र अहिले संचालनमा आएको ठाउँमा दक्ष प्रशिक्षकहरुले तालिम दिने उनको भनाइ थियो ।
उनले निजी रुपमा संचालित भएपनि यसले समाजका महिला पुरुषलाई तेक्वान्दोमा लाग्न प्रेरित गर्ने र नृत्य समेत सिक्न पाइने भएकाले बहुमुखी प्रतिभाको प्रष्फुटनसँगै थप सिप सिक्ने अवसर मिल्ने बताए । खेल समाजको चासो र महत्व रहने भएकाले आफ्ना वालवालिकालाई खेलप्रति रुचि जगाउन अभिभावकहरुप्रति उनको आग्रह थियो ।
थर्डडन ब्ल्याक बेल्टको सर्टिफिकेट प्राप्त गर्न सफल स्टुडियोका संचालिका नीता श्रेष्ठका अनुसार विहान डान्स सहितको जुम्बा कक्षा र बेलुकी पाँच बजेदेखि तेक्वान्दो कक्षा हुनेछ । गरिव परिवारका खेलप्रति इच्छुक महिला पुरुषलाई निःशुल्क समेत तालिम दिइरहेको भन्दै नाफा कमाउन नभई अझ बढी महिलाहरुलाई आत्मरक्षाको तालिम दिन कृष्णपुर तेक्वान्दो डोजाङ र बीग डान्स स्टुडियो जुम्बा हाउस संचालनमा ल्याएको बताइन् ।
मार्सल आर्ट सिकाइने उक्त स्टुडियो १२ धुर क्षेत्रफलमा करिव २४ लाखको लागतमा सुविधासम्पन्न छ । आफू समेत यसै खेलको खेलाडि भएको र यसैको माध्यमबाट सरकारी सेवामा समेत प्रवेश गर्ने अवसर पाएको बताइन् । यो खेलले आत्मरक्षा र आत्मविश्वास बढाउन ठूलो मद्दत मिल्ने भएकाले आफ्ना बालवालिका पठाएर सहयोग गर्न उनको आह्वान छ । अझ बढी महिलाहरुलाई जोड दिएको र आत्मरक्षाको ज्ञान सिकेर आफूलाई सक्षम गराउन उनको आग्रह छ ।
संगीतको आनन्दमा सिकाइने भएकाले चाँडै र सजिलै सिक्न सकिने समेत उनको दावी छ । तेक्वान्दोमै लाग्ने हो भने भविष्यपनि राम्रो भएको भन्दै स्वस्थ र सुरक्षाका लागि यो खेल सिक्न आउन उनले आग्रह गरिन् । भर्ना हुन आउने वालवालिकाहरुलाई पोषाक सहित रु. २ हजार लिएर कक्षा प्रदान गरिएको श्रेष्ठले बताइन् ।
कृष्णपुर खेलमैदान नजिकै संचालनमा आएको उक्त स्टुडियो उद्घाटनका अवसरमा मार्सल आर्टका विभिन्न कला प्रस्तुत गरिएको थियो । कार्यक्रममा चितवन फुटवल संघका अध्यक्ष श्रीकृष्ण कार्की, राष्ट्रिय तेक्वान्दो संघ चितवनका कोषाध्यक्ष बालद गुरुङ, राष्ट्रिय तेक्वान्दो संघ गैँडाकोट नगर समितिका अध्यक्ष गोपाल परियार सहित अभिभावकहरुको सहभागीता रहेको थियो ।