चितवनमा कांग्रेसका ५० कार्यकर्ताको सामूहिक राजीनामा

चितवन / चितवनको भरतपुर महानगरपालिका वडा नं.–१७ मा नेपाली कांग्रेसका ५० जना कार्यकर्ताले राजीनामा दिएका छन् । पार्टीभित्र स्वार्थ केन्द्रित राजनीति हावी भएको भन्दै नेपाली कांग्रेसका ५० जना कार्यकर्ताले शनिबार एक विज्ञप्ति जारी राजीनामा दिएका हुन् ।
वडा समितिका पूर्वसभापति विष्णुप्रसाद सुवेदी, पूर्व वडाध्यक्ष देवनारायण महतोसहित ५० जना क्रियाशील तथा साधारण सदस्यले राजीनामा दिएका हुन् । राजीनामा दिनेहरूमा प्रकाश कँडेल, डिलाराम कँडेल, रामु सापकोटा, पुनाखर गैरे, रितनारायण श्रेष्ठ, कृष्णप्रसाद ढकाल, माधवप्रसाद सापकोटा, निर्मला गैतम, मीरा पोखरेल, बलराम कँडेल लगायत रहेका छन् ।
विज्ञप्तिमा जनताका आधारभूत आवश्यकतामा मौन रहने स्वार्थ केन्द्रित राजनीतिक दुष्चक्रबाट आजित भएको उल्लेख गरिएको छ । उनीहरुले अमेरिकी सहयोग परियोजना एमसीसी पारित गरेकोमा पनि विरोध जनाएका छन् ।
वडाको विकासमा जनसहभागिताको रकम दुरूपयोग गरिएको, जनप्रतिनिधि कमिसनमा रमाएको, कृषकका समस्याहरूलाई बेवास्ता गरिएको र सडक निर्माण अलपत्र पारिएको विज्ञप्तिमा जनाइएको छ ।
वडा समितिका पूर्व सभापति विष्णुप्रसाद सुवेदीले जनताभन्दा माथि व्यक्तिमुखी राजनीति चलेकोले आफूहरु आजित भएको र पार्टी परित्याग गरी स्वतन्त्र नागरिक मञ्च गठन गरिएको बताए ।