बझाङ जिप दुर्घटना : एकको घटनास्थलमै मृत्यु, ३ घाइते

बझाङ / बझाङको सुर्मा गाउँपालिकामा जीप दुर्घटना हुँदा एक जनाको मृत्यु ३ जना घाइते भएका छन् । नेपाली कांग्रेस बझाङका सभापति खडक बोहरा र उनको परिवार सवार भएको जिप दुर्घटना भएको जिल्ला प्रहरी कार्यालय बझाङले जनाएको छ ।
जिल्ला प्रहरी कार्यालय बझाङका सूचना अधिकारी कमलप्रसाद चौधरीका अनुसार बझाङको सुर्मा गाउँपालिकाबाट धनगढीतर्फ गइरहेको सुपप्र ०१–००१ च ००९५ नम्बरको जीप वित्थडचिर गाउँपालिका वडा नम्बर ४ देउलेख बजार नजिकै दुर्घटना भएको हो ।
प्रहरीका अनुसार दुर्घनामा परी सुर्माका विनोद बोहराको घटनास्थलमै ज्यान गएको छ भने सभापति बोहरासहित ३ जना घाइते भएका छन् । विनोद सभापति बोहराका छोरा हुन् । घाइतेहरुको देउलेख प्राथमिक स्वास्थ्य केन्द्रमा उपचार हुन नसकेपछि धनगढी रिफर गरिएको छ । प्रहरीका अनुसार जीप शनिबार राति १२ः४० बजे दुर्घटना भएको हो ।
उक्त जीपमा ३ जना महिला र ६ जना पुरुष गरी ९ जना सवार रहेको प्रहरीले जनाएको छ ।