एमालेको महानगर र उपमहानगरको उम्मेदवार टुंगो बैशाख १० मा

काठमाडौं / नेकपा एमालेले महानगरपालिका र उपमहानगरपालिकाका मेयर र उपमेयरको उम्मेदवारी यही बैशाख १० गतेमात्रै टुंगो लगाउने भएका छन् । एमालेको बिहीबार बसेको केन्द्रीय सचिवालय बैठकले सो निर्णय गरेको हो ।
बैठकमा सातै प्रदेशबाट महानगर र उपमहानगरका लागि उम्मेदवार सिफारिस गरेका नामहरूबारे सामान्य छलफल गर्दै अर्को बैठकले उम्मेदवार तय गर्ने निर्णय गरेको प्रचार विभाग प्रमुख पृथ्वीसुब्बा गुरुङले जानकारी दिए । उनका अनुसार, एमाले केन्द्रीय सचिवालय बैठक बैशाख १० गते दिनको ३ बजेका लागि बोलाइएको छ ।
एमालेसहित सबैजसो दलहरु आगामी बैशाख ३० गते हुने स्थानीय तह निर्वाचनका लागि उम्मेदवार चयनमा व्यस्त छन् । निर्वाचन आयोगले बैशाख ११ र १२ गते उम्मेदवार मनोनयनका लागि समय छुट्याएको छ ।