चलचित्र ‘लक्का जवान’ देशैभर बैशाख २३ बाट प्रदर्शन

चितवन / नेपाली कथानक चलचित्र ’लक्का जवान’ देशभर एक साथ प्रदर्शन हुने भएको छ । चलचित्र युनिटले बैशाख २३ गतेबाट देशभर एक साथ प्रदर्शन हुने मंगलबार पत्रकार सम्मेलन मार्फत जानकारी दिएका छन् ।
चलचित्र युनिटले ’लक्का जवान’ मा नेपाली समाजको अर्गानिक कथा उठाएको जनाएको छ । चलचित्रका निर्देशक शिवहरि ढकालले चलचित्रमा गाउँ घर समाजको कथालाई चित्रण गरिएको बताए ।
उनले चलचित्रमा कतैबाट आयातित कथा नभई नेपाली समाजकै अर्गानिक कथा प्रस्तुत गरिएको बताए । यस्तै उनले चलचित्रमा दर्शकले टेलिभिजनको पर्दामा देखेका ४० भन्दा बढी कलकारहरुले अभिनय गरेको जानकारी दिए ।
निर्माता ध्रुव वन्तले चलचित्र निर्माण गर्ने लामो समयदेखिको चाहना ’लक्का जवान’ बाट पुरा भएको जिकिर गरे । तीन वर्ष अघि निर्माण भएको चलचित्र कोभिडका कारण प्रदर्शनमा ढिलाई भएको उनको भनाइ थियो ।
कलाकार किरण केसीका अनुसार चलचित्र ८० प्रतिशत कमेडीले भरिएको छ । चलचित्रमा दर्शकलाई सोचनिय बनाउने र रुवाउने कथावस्तु समावेश गरिएको उनले भने ।
नायक दिलिप रायमाझीले उक्त चलचित्रमा घर–घरको कथावस्तु रहेको बताए । उनले ’लक्का जवान’ लाई कथै कथाको मिश्रणको रुपमा व्याख्या गरे । उनले चलचित्रको कथाले दर्शकको मन छुने दावी गरे । उनले चलचित्रमा आफुले देश छोडेर विदेशिएको युवाको भूमिका निभाएको बताए ।
नायक सलोन बस्नेतले ’लक्का जवान’लाई शुद्ध नेपाली कथा बोलेको चलचित्रको रुपमा व्याख्या गरे । उनले नेपाली समाजमा देखे सुनेको कथा नै चलचित्रमा उठाइएको बताए ।
निर्देशक पौडेलले नै चलचित्रको कथा, पटकथा र संवाद तयार पारेका हुन् । चलचित्रमा मदनकृष्ण श्रेष्ठ, प्रियंका कार्की, वर्षा सिवाकोटी, राजाराम पौडेल, सुशील पोख्रेल, स्वर्गीय जयनन्द लामा, सरोज खनाल, मनिषा श्रेष्ठलगायतको अभिनय रहेको छ ।
पुरुषोत्तम प्रधानले खिचेको चलचित्रलाई मित्र डि गुरुङले सम्पादन गरेका हुन् । चलचित्रको ट्रेलर र दुई वटा गीत युट्युबमा सार्वजनिक भइसकेको छ ।