चितवनमा ट्रक कब्जा गरी लत्ताकपडा चोरी गर्ने गिरोह पक्राउ

चितवन / चितवनमा ट्रक कब्जामा लिई खुद्रा सामान र लत्ताकपडा चोरी गर्ने गिरोहका केही व्यक्तिलाई पक्राउ परेका छन् । उनीहरुले वीरगञ्जबाट आउँदै गरेका दुइटा ट्रकमा लोड गरिएका खुद्रा सामान र लत्ताकपडा पूर्व–पश्चिम राजमार्गको नयाँ बस्ती मा लुटेको जिल्ला प्रहरी कार्यालय चितवनले जानकारी दिए ।
प्रहरीका अनुसार राप्ती नगरपालिका–१ मा पर्ने राजमार्गमा ५÷७ जनाको नकाबधारी समूहले ट्रकलाई रोकेर चालकलाई लुटेको हो । ट्रक चालकलाई नियन्त्रणमा लिएर लोड गरिएका सामानहरु कब्जामा लिएको अनुसन्धानबाट देखिएको चितवन प्रहरी प्रमुख (एसपी) नवराज अधिकारीले बताए ।
खोजतलास गर्नेक्रममा बागमती प्रदेश ०३–००१ च ०६६२ नम्बरको सवारी साधन, त्यसका चालक वर्ष १९ का पवन भट्टराई र त्यसमा सवार वर्ष २४ का मनिष केसीलाई राप्ती–८ वीरेन्द्रनगरबाट र प्रदेश २–०३–००१ च ०८४७ नम्बरको सवारी साधन र चालक वर्ष ३९ का ऋषिराम शर्मालाई खैरहनी–९ सिमलटाँडीबाट नियन्त्रणमा लिइएको प्रहरी प्रमुख अधिकारीले बताए ।
लुटिएका लत्ता कपडाहरु रत्ननगर–१४ लौरीघोल स्थित गाई फारमबाट बरामद गरिएको हो भने ना३ख ७६२९ र ना३ख ७६५६ सम्बरका ट्रक र चोरी गरिएका बाहेकका लत्ताकपडा आवश्यक अनुसन्धानका लागि राजश्व अनुसन्धान कार्यालय पथलैया पठाइएको छ । पक्राउ परेका व्यक्तिहरूलाई चितवन जिल्ला अदालतबाट ७ दिनको म्याद लिएर अनुसन्धान भइरहेको उनले बताए ।
बरामद गरिएको कपडा र चोरीमा संलग्न सवारी साधन जिल्ला प्रहरी कार्यालयको नियन्त्रणमा छन् ।