चितवनमा गठबन्धनको चुनावी सभा : प्रम देउवासहित शीर्ष नेताहरुको सम्बोधन

चितवन / गठबन्धनले चितवनको भरतपुर महानगरपालिकाको हाकिमचोकस्थित बसपार्कमा चुनावी आमसभा गर्दैछ । संयुक्त आमसभामा गठबन्धनका शीर्ष नेताले आज बिहीबार सम्बोधन गर्ने भएका छन् ।
उक्त सभालाई प्रधानमन्त्री एवं नेपाली काँग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’, एकीकृत नेकपा समाजवादीका अध्यक्ष माधवकुमार नेपाल, काँग्रेसका वरिष्ठ नेता रामचन्द्र पौडेल लगायतले सम्बोधन गर्ने छन् ।
उक्त सभालाई जसपा र राष्ट्रिय जनमोर्चाका केन्द्रीय नेताहरुले पनि सम्बोधन गर्ने जनाइएको छ । काँग्रेस चितवनका सभापति राजेश्वर खनालका अनुसार सभालाई सम्बोधन गर्न काँग्रेस सभापति देउवा र वरिष्ठ नेता पौडेल बुधबार नै चितवन आईपुगेका छन् ।
माओवादी केन्द्रका अध्यक्ष प्रचण्ड र एकीकृत समाजवादीका अध्यक्ष नेपाल विहान ९ बजेको उडानमा चितवन आउन लागेको खनालले बताए । उनका अनुसार गठबन्धनका शीर्ष चार नेताका साथै अन्य १० जना केन्द्रीय नेताको सम्बोधन रहने छ । त्यसका लागि गठबन्धनको जिल्ला संयन्त्र आन्तरिक तयारीमा रहेको खनालले जानकारी दिए ।
चितवनका सबै पालिकामा गठबन्धन चुनावी तालमेल गरी प्रतिस्पर्धामा उत्रिएको छ । भरतपुर महानगरपालिकाको मेयरमा माओवादी केन्द्रकी रेनु दाहाल र उपमेयरमा काँग्रेसका चित्रसेन अधिकारी उम्मेदवार छन् ।