गणेशबहादुर स्मृति फुटबलको फाइनलमा जुएफसी जुगेडी

चितवन / जु एफसी भरतपुर २९ जुगेडी भरतपुरमा जारी पाचौं स्वर्गीय गणेशबहादुर स्मृति जिल्ला स्तरीय खुल्ला नकआउट फुटबलको फाइनलमा प्रवेश गरेको छ ।
आयोजक नारायणी मोटर्स युनिक क्लब ‘बी’ लाई २–१ ले पाखा लगाउदै शुक्रवार भएको पहिलो सेमिफाइनल खेलमा जुगेडी उपाधि नजिक पुगेको हो ।
जुगेडीको जितमा सुमित श्रेष्ठ र अनुप भण्डरीले गोल गरे । युनिकका जय श्रेष्ठले एक गोल फर्काए । प्रतिस्पर्धात्मक खेलको पहिलो हाफ गोलरहित बराबरीमा सकिएको थियो ।
तिनै गोल दोस्रो हाफमा सम्भव भयो । दोस्रो हाफको २० औं मिनेटमा सुमितको गोलबाट जुगेडीले अग्रता लियो । २४ औं मिनेटमा अनुजले जुगेडीको अग्रता दोब्बर बनाए । ३१ औं मिनेटमा युनिकका जयले गोल फर्काए पनि जुगेडीलाई रोक्न सकेनन् । जुगेडिका अनुज म्यान अफ दि म्याच भए ।
यस अघि सौराहा युवा समाज र टाईगर युवा क्लबबीचको पहिलो सेमिफाइनल खेल वर्षाका कारण स्थगित भयो । उक्त खेल शनिबार दिउँसो २ बजे हुनेछ ।
भरतपुर ११ कैलाश टोलमा जारी प्रतियोगिताको विजेताले एक लाख २० हजार तथा उपविजेताले ६० हजार प्राप्त गर्नेछन् । सर्वोकृष्ट खेलाडीले पाँच हजार तथा उत्कृष्ट गोलरक्षक, डिफेन्स, स्ट्राईकर, उच्च गोलकर्ता तथा उदयमान खेलाडीले नगद तीन–तीन हजार प्राप्त गर्नेछन् ।